بھونیشور، 21 اکتوبر ۔ بین الاقوامی وقفے کے بعد انڈین سپر لیگ (آئی ایس ایل) 24-2023میں ایکشن پھر شروع ہوگا جب ہفتہ کی شام بھونیشور کے کلنگا اسٹیڈیم میں ایسٹ بنگال ایف سی کا مقابلہ ایف سی گوا سے ہوگا۔
ایف سی گوا نے اپنے پچھلے میچ میں اڈیشہ ایف سی کے خلاف 2-3 سے سنسنی خیز جیت حاصل کی تھی، جبکہ کارلس کواڈراٹ کی ریڈ اینڈ گولڈ بریگیڈ کو میچ ویک 3 میں بنگلورو ایف سی کے ہاتھوں 1-2 سے شکست ہوئی تھی۔ دونوں ٹیموں نے اب تک اپنی مہم کا مضبوط آغاز کیا ہے اور دونوں ہی آنے والے میچ میں مطلوبہ نتائج کی امید کر رہی ہوں گی۔
ایسٹ بنگال ایف سی نے اب تک کھیلے گئے اپنے تین میچوں میں ایک جیتا، ایک ڈرا اور ایک ہارا ہے۔ متاثر کن پرفارمنس کے باوجود، انہیں ترقی کے لیے مزید پوائنٹس لینے کی ضرورت ہے اور کواڈراٹ اس بات سے بخوبی واقف ہوں گے کیونکہ ہسپانوی کوچ خود آئی ایس ایل کے سابق چیمپیئن ہیں۔
ایف سی گوا کے ہسپانوی کوچ مینولو مارکوئیز نے اپنی ٹیم کو اپنے انداز کا فٹ بال کھیلنے کی ترغیب دی ہے اور اڈیشہ ایف سی کے خلاف آخری لمحات میں ان کا کامیاب تعاقب ان کے انتھک جذبے کی عکاسی کرتا ہے۔ گھر سے دور میچ ان کے لیے عزم کے ساتھ اس کامیابی کو آگے بڑھانے کا بہترین موقع ہوگا۔
ایسٹ بنگال ایف سی کے ہیڈ کوچ کواڈراٹ نے اب تک کی مہم سے سیکھے گئے سبق کے بارے میں بات کی۔ انہوں نے کہا، ’’ہم نے اس سیزن میں (تمام مقابلوں میں) اب تک نو آفیشل میچز کھیلے ہیں۔ ہم صرف دو میچ ہارے ہیں، لیکن یہ دو میچ، ڈیورنڈ کپ فائنل اور کانتیراوا کا میچ تھا، ہمیں ان میچوں سے کچھ سبق لینے کی ضرورت تھی۔ بطور کوچ میرے لیے بہتری کی گنجائش ہے۔ اگر آپ کو بہتر مواقع مل رہے ہیں، اگر آپ بہت سے مواقع ضائع نہیں کر رہے ہیں، تو آپ کو میچ ختم کرنا ہوگا اور کم از کم ایک پوائنٹ لینا ہوگا۔‘‘
مارکوئیز نے اس آئی ایس ایل سیزن کے ایف سی گوا کے پہلے اوے میچ کو لیکر کہا، ’’شاید، 20-15 سال پہلے، گھر اور باہر کھیلنے میں بہت فرق ہوا کرتا تھا۔ لیکن اب، میرے خیال میں کم و بیش تمام ٹیمیں گھر اور باہر دونوں ایک ہی انداز میں کھیلتی ہیں۔ یقیناً ہمیں اپنے مداحوں کے سامنے کھیلنا پسند ہے۔ لیکن اب، مجھے لگتا ہے کہ ہمیں اس پہلو کے حوالے سے بہت زیادہ تبدیلی نہیں کرنی پڑے گی۔ میں اس بارے میں بہت پر امید ہوں۔ میں نے پہلے دن سے ہی اس بات کا اعادہ کیا ہے کہ یہ بہت اچھا سیزن ہوگا۔‘‘
دونوں ٹیموں کے درمیان اب تک 6 میچ کھیلے جا چکے ہیں جن میں ایسٹ بنگال ایف سی نے 1 اور ایف سی گوا نے تین میچ جیتے ہیں۔ دونوں کے درمیان 2 میچ ڈرا ہوئے ہیں۔
