ایس اے 20 کی تاریخ میں سب سے کم اسکور پر آوٹ ہوئی پریٹوریا کیپٹلز
گکیبرہا، 23 جنوری (ہ س)۔ دفاعی چیمپئن سن رائزرز ایسٹرن کیپ نے پریٹوریا کیپٹلز کو پیر کی رات ایس اے 20 کی مختصر تاریخ کے سب سے کم اسکور 50 رن پر سمیٹ دیا اور اس اسکور کا تعاقب کرتے ہوئے صرف سات اوورز میں ایک اہم بونس پوائنٹ حاصل کر لیا۔
سینٹ جارج پارک کی پچ پر جہاں حیرت انگیز طور پر تیز گیند بازوں کے لیے تیز اچھال تھا۔ میزبان ٹیم کا پہلے گیندبازی کرنے کا فیصلہ بالکل صحیح ثابت ہوا۔ میچ کے تیسرے اوور تک پریٹوریا کیپٹلز کے لیے سب کچھ ٹھیک تھا لیکن تیسرے اوور کی آخری گیند پر 25 کے مجموعی اسکور پر ڈینیل وارال نے فل سالٹ (10) کو اسٹمپ کے پیچھے ٹرسٹن اسٹبس کے ہاتھوں کیچ آوٹ کرا کے پویلین بھیج دیا اور یہاں سے کیپٹلز کی گاڑی پٹری سے اتر گئی۔
چوتھے اوور میں مارکو یانسن نے ول جیکس (12) کو پویلین بھیج کر کیپٹلز کو دوہرا جھٹکا دیا۔ اس کے بعد کیپٹلز کی اننگز ڈگمگا گئی اور پوری ٹیم 13.3 اوورز میں صرف 52 رن پر ڈھیر ہو گئی۔
سن رائزرز ایسٹرن کیپ کی جانب سے اوٹنیل بارٹ مین نے 4، ڈینیئل وارال نے 3، مارکو یانسن نے 2 اور پیٹرک کرگر نے ایک وکٹ حاصل کی۔
53 رن کے چھوٹے اسکور کا تعاقب کرنے اتری ایسٹرن کیپ کا آغاز بھی خراب رہا اور وین پارنیل نے صرف 4 رن کے مجموعی اسکور پر ڈیوڈ مالن (1) کو پویلین بھیج دیا۔ اس کے بعد جارڈن ہرمن (ناٹ آوٹ 20) اور ٹام ایبل (31 ناٹ آوٹ) نے مزید نقصان نہیں ہونے دیا اور اپنی ٹیم کو 6.5 اوورز میں فتح دلادی۔
