بنگلورو، 11 دسمبر (ہ س)۔
ہندوستانی مردوں اور خواتین کی ہاکی ٹیموں نے پانچ ممالک کے ٹورنامنٹ میں حصہ لینے کے لئے آج بنگلورو کے کیمپو گوڑا بین الاقوامی ہوائی اڈے (کے آئی اے ) سے اسپین کے والنسیا کے لئے پروز بھری۔ یہ ٹورنامنٹ 15 دسمبر سے 22 دسمبر تک منعقد کیا جائے گا۔
ہندوستانی خواتین ہاکی ٹیم ٹورنامنٹ کے پہلے میچ میں 15 دسمبر کو میزبان اسپین کا مقابلہ کرے گی، اس کے بعد 16 دسمبر کو بیلجیئم، 19 دسمبر کو جرمنی اور 21 دسمبر کو اپنے آخری میچ میں آئرلینڈ کا مقابلہ ہوگا۔
اسی طرح ہندوستانی مردوں کی ہاکی ٹیم 5 ملکی ٹورنامنٹ کے اپنے پہلے میچ میں 15 دسمبر کو میزبان اسپین کا مقابلہ کرے گی، اس کے بعد 16 دسمبر کو بیلجیم، 19 دسمبر کو جرمنی اور 20 دسمبر کو فرانس سے مقابلہ ہوگا۔
والینسیا کے لیے پرواز کرنے سے پہلے، ہندوستانی خواتین کی ہاکی ٹیم کی کپتان سویتا نے کہا، یہ ٹورنامنٹ ہمیں اگلے ماہ ہونے والے اہم ایف آئی ایچ ہاکی اولمپک کوالیفائر رانچی 2024 سے قبل دنیا کی کچھ اعلیٰ ہاکی ٹیموں کے خلاف انمول تجربہ فراہم کرے گا۔ ٹورنامنٹ میں جانے کا ہمارا مقصد اس بات کو یقینی بنانا ہے کہ ہم اپنی تمام خامیوں کو دور کریں اور اپنی بہترین صلاحیت کے مطابق کھیلیں۔
ہندوستانی مردوں کی ہاکی ٹیم کے کپتان ہرمن پریت سنگھ نے بھی 5 ملکی ٹورنامنٹ کی اہمیت کے بارے میں کہا، ہم اس وقت دنیا میں تیسرے نمبر پر ہیں، لیکن ہم پیرس 2024 اولمپکس سے قبل اپنے عزائم کے مطابق مزید اوپر چڑھنے کی کوشش کریں گے۔ ایسا کرنے کے لیے ہمیں ویلنسیا میں آنے والی سخت ٹیموں کے خلاف اپنی صلاحیتوں کو جانچنا ہوگا اور اس بات کو یقینی بنانا ہوگا کہ ہم ٹاپ پر آئیں۔ یہ ایک بہت اچھا تجربہ ہوگا اور ٹیم ٹورنامنٹ شروع کرنے کی منتظر ہے۔
ہندوستھان سماچار
