ہریانہ اسٹیلرز نے درج کی پانچویں جیت، تمل تھلائیواز کو 29-42 کے بڑے فرق سے ہرایا
چنئی، 26 دسمبر (ہ س)۔ ہریانہ اسٹیلرز نے اپنی جیت کی مہم کو جاری رکھتے ہوئے پیر کی رات یہاں ایس ڈی اے ٹی ملٹی پرپز انڈور اسٹیڈیم میں کھیلے گئے پرو کبڈی لیگ (پی کے ایل) کے 10ویں سیزن کے 41ویں میچ میں تمل تھلائیواز کو 29-42 کے بڑے فرق سے شکست دی۔ ہریانہ کے لیے شیوم نے آٹھ پوائنٹس اور جے دیپ دہیا نے سات پوائنٹ لیے۔ ساحل گلیا نے تمل تھلائیواز کے دفاع میں 10 پوائنٹس بنائے۔
یہ ہریانہ کی سات میچوں میں مسلسل پانچویں جیت ہے اور ٹیم کے اب 26 پوائنٹس ہو گئے ہیں اور وہ اب دوسرے نمبر پر پہنچ گئی ہے۔ تمل تھلائیواز کو سات میچوں میں پانچویں شکست کا سامنا کرنا پڑا ہے۔ تمل تھلائیواز اب بھی اپنے ہوم لیگ میں اپنی پہلی جیت کی تلاش میں ہیں۔
ہریانہ اسٹیلرز نے میزبان تمل تھلائیواز کے خلاف دفاع میں شاندار آغاز کیا اور پہلے پانچ منٹ میں ہی اسکور 1-4 کر دیا۔ ہریانہ کی ٹیم نے اپنے دفاع کو مضبوط رکھتے ہوئے کھیل کے پہلے 10 منٹ میں 3-6 کے اسکور کے ساتھ تین پوائنٹس کی برتری حاصل کی۔ حالانکہ تھلائیواز نے اگلے ہی منٹ میں سپر ٹیکل کرکے ہریانہ کی برتری کو صرف ایک پوائنٹ تک محدود کردیا۔
12ویں منٹ میں ونے نے سپر ریڈ کرکے تمل تھلائیواز کو آل آؤٹ کر دیا اور پانچ پوائنٹس حاصل کر لیے۔ اس کے ساتھ ہی ہریانہ نے میچ میں 7-14 کی شاندار برتری حاصل کر لی۔ دو منٹ بعد سدھارتھ دیسائی ٹیکل کر لیے گئے اور تمل کی مشکلات میں مزید اضافہ ہوگیا۔ لیکن ایک وقت ایسا لگا کہ فرق پانچ پوائنٹس کا ہو رہا ہے کہ تبھی ہریانہ نے پھر اپنی برتری مضبوط کر لی۔
ہریانہ نے ریڈ کے ساتھ ساتھ دفاع میں بھی پوائنٹس اسکور کرنے کا سلسلہ جاری رکھا، اس کی برتری سات پوائنٹس تک پہنچ گئی۔ اس کے ساتھ ہی ٹیم نے چھ پوائنٹس کی برتری حاصل کی اور پہلا ہاف 12-18 کے اسکور کے ساتھ ختم کیا۔
دوسرے ہاف کے آغاز کے بعد ہریانہ نے پوائنٹس بنانے کا سلسلہ جاری رکھا جبکہ تمل تھلائیواز نے بھی آہستہ آہستہ مقابلے میں واپسی شروع کی۔ اس کے باوجود ہریانہ کو 10 پوائنٹس کی کمانڈنگ برتری حاصل تھی۔ 27 ویں منٹ میں ہمانشو نے سپر ریڈ کرکے تمل کی ٹیم کو میچ میں برقرار رکھنے کی کوشش کی۔
تمل تھلائیواز کی شاندار واپسی کی وجہ سے ہریانہ کی ٹیم آل آؤٹ کے راستے پر تھی۔ لیکن 29 ویں منٹ میں ہریانہ کے ڈیفینڈروں نے ایک سپر ٹیکل کرکے آل آوٹ کے امکان کو مسترد کردیا۔ اس دوران راہل سیٹھ پال نے بھی اپنا ہائی 5 مکمل کیا۔ 30ویں منٹ تک ہریانہ کے پاس 8 پوائنٹس کی برتری تھی اور اس کا اسکور 21-29 تھا۔
اگلے چند منٹوں میں ہریانہ نے ایک سپر ٹیکل کرکے اپنی برتری کو 10 پوائنٹس تک بڑھا دیا۔ 32 ویں منٹ میں ڈو اور ڈائی میں آئے اجنکیا پوار سپر ٹیکل ہوگئے اور ہریانہ اسٹیلرز کا اسکور 22-35 ہوگیا۔ کچھ ہی دیر میں ہریانہ کی برتری 13 پوائنٹس تک پہنچ گئی اور ٹیم نے اسے آخر تک برقرار رکھا اور 29-42 کے اسکور کے ساتھ سیزن کی مسلسل پانچویں جیت درج کی۔
ہندوستھان سماچار
/شہزاد
