ٹام لیتھم کا دو بار کیچ چھوڑنا افغانستان کو مہنگا پڑا: جوناتھن ٹراٹ
چنئی، 19 اکتوبر (ہ س)۔ بدھ کو چنئی کے ایم اے چدمبرم اسٹیڈیم میں ون ڈے ورلڈ کپ 2023 کے 16ویں میچ میں نیوزی لینڈ کے خلاف افغانستان کی 149 رنوں سے شکست کے بعد افغان ٹیم کے ہیڈ کوچ جوناتھن ٹروٹ نے کہا کہ نیوزی لینڈ نے میچ میں اچھی کارکردگی کا مظاہرہ کیا۔
میچ کے بعد پریس کانفرنس میں جوناتھن ٹراٹ نے کہا کہ افغانستان کو ٹام لیتھم کے دو بار کیچ چھوڑنے کا خمیازہ بھگتنا پڑا۔
ٹروٹ نے کہا، ’’میرے خیال میں انہوں نے اچھا کھیلا، لیکن انہوں نے خود کو اندرکر لیا، جیسا کہ ہم نے دیکھا کہ جیسے ہی ہمارے بلے باز تھوڑا سا اندر آئے، ٹریک پر بلے بازی کرنا تھوڑا آسان ہوگیا۔ لیکن ہم طویل وقت تک ایسا نہیں کر سکے۔ بدقسمتی سے ہم نے دو کیچ بھی چھوڑ دیے۔ مجھے لگتا ہے کہ ہم نے دو بار لیتھم کا کیچ چھوڑا، جس کی ہمیں قیمت چکانی پڑی۔‘‘
ٹروٹ نے کہا کہ غلط فیلڈنگ دباو کی وجہ سے نہیں ہے اور یہ بھی تسلیم کیا کہ حال ہی میں ون ڈے عالمی کپ 2023 میں یہ کچھ زیادہ ہی ہورہا ہے۔
انہوں نے کہا، ’’میں کہوں گا کہ یہ دباو نہیں ہے، مجھے لگتا ہے کہ جب سے میں انچارج بنا ہوں، تب سے یہ کچھ زیادہ ہو رہا ہے۔ لہٰذا، اگر آپ اعداد و شمار کو دیکھیں تو بدقسمتی سے، یہ کیچوں کے معاملے میں بہت نیچے ہے۔ لہٰذا اس میں بہتری لانے کی ضرورت ہے اور مجھے لگتا ہے کہ یہ وہ چیز ہے جس پر ہم نے تربیت میں بہت محنت کی ہے، ہمیں اب اسے کھیلوں میں کرنے کی ضرورت ہے۔‘‘
میچ کی بات کریں تو نیوزی لینڈ نے ٹام لیتھم اور گلین فلپس کی نصف سنچریوں کے بعد سینٹنر اور لوکی فرگوسن کی شاندار گیندبازی کی بدولت افغانستان کو 149 رنوں سے شکست دی۔
پہلے بلے بازی کرتے ہوئے نیوزی لینڈ کی ٹیم 110 رن پر 4 وکٹیں گنوا کر مشکلات کا شکار تھی تاہم اس کے بعد گلین فلپس (71) اور ٹام لیتھم (68) نے 144 رنوں کی شراکت قائم کی اور ٹیم کا اسکور 6 وکٹوں پر 288 رن تک پہنچا دیا۔ جواب میں افغانستان کی ٹیم 34.4 اوورز میں 139 رنوں پر آل آوٹ ہوگئی۔
ہندوستھان سماچار
/شہزاد
