ورلڈ کپ: ڈبل سنچری کے ساتھ ٹیم کو فتح سے ہمکنار کرنے کے بعد میکسویل نے کہا – کریز پر رکنا چاہتا تھا

ممبئی، 8 نومبر (ہ س)۔

آئی سی سی کرکٹ ورلڈ کپ میں افغانستان کے خلاف میچ میں ٹانگوں میں درد کے باوجود آسٹریلوی آل راؤنڈر گلین میکسویل نے ڈبل سنچری بنا کر اپنی ٹیم کو حیران کن فتح دلادی۔ میکسویل نے کہا کہ پویلین واپس جانے کا موقع ملنے کے باوجود وہ کریز پر ہی رہنا چاہتے تھے تاکہ ان کی ٹانگوں میں کچھ حرکت آئے۔

جیت کے لیے 292 رنوں کے تعاقب میں آسٹریلوی ٹیم ایک موقع پر 19ویں اوور میں صرف 91 رنوں پر 7 وکٹیں گنوا چکی تھی، اس کے بعد میکسویل اور کمنز نے آٹھویں وکٹ کے لیے 202 رنوں کی ریکارڈ شراکت داری قائم کی۔

کمنز نے 68 گیندوں پر 12 رنوں کی ناقابل شکست اننگز کھیلی، میکسویل نے 128 گیندوں پر 201 رن بنائے اور اس دوران انہوں نے 21 چوکے اور 10 چھکے لگائے۔ کئی مواقع پر، ایسا لگا کہ انہیں ریٹائر ہرٹ ہونا پڑے گا، ایڈم زمپا ان کی جگہ لینے کے لیے کھڑے ہو گئے، لیکن میکسویل نے ہمت نہیں ہاری اور شاندار انداز میں اپنی ٹیم کو فتح سے ہمکنار کیا۔

میچ کے بعد میکسویل نے کہا،’’ فیلڈنگ کے دوران بہت گرمی تھی، میں نے گرمی میں زیادہ ورزش نہیں کی، گرمی مجھے لگ گئی، میں رک کر (اپنی ٹانگوں پر) کچھ حرکت کرنا چاہتا تھا۔‘‘

انہوں نے کہا۔ ’’ہم ایک ہی سرے پر کچھ دیر ٹھہرنے کا منصوبہ بناکرآئے تھے جب تک کہ میں کریز پر مکمل طور پر سیٹ نہیں ہوجاتا اور گیند کو صحیح طریقے سے ہٹ نہیں کرتا اور ایک بار جب میں جم گیا تو خوش قسمتی سے شروع سے آخر تک اپنی تال کو برقرار رکھا۔‘‘

میچ کے حوالے سے بات کی جائے تو افغانستان نے پہلے بلے بازی کا فیصلہ کیا۔ ابراہیم زدران (ناٹ آؤٹ 129)، رحمت شاہ (30)، کپتان حشمت اللہ شاہدی (26)، عظمت اللہ عمرزئی (22) کی شاندار سنچریاں اور پھر آخری چند اوورز میں راشد خان (18 گیندوں پر 35*، دو چوکوں اور تین چھکوں کے ساتھ) تیز اننگز کی بدولت افغانستان نے مقررہ 50 اوور میں 5 وکٹوں کے نقصان پر 291 رن بنائے۔

آسٹریلیا کی جانب سے جوش ہیزل ووڈ نے دو، ایڈم زمپا، مچل اسٹارک اور گلین میکسویل نے ایک ایک وکٹ حاصل کی۔

292 رنوں کے ہدف کے تعاقب میں آسٹریلیا ایک وقت بڑی مشکل میں تھا جس نے 91 رن پر 7 وکٹیں گنوا دی تھیں لیکن پھر گلین میکسویل نے کپتان پیٹ کمنز کے ساتھ مل کر تاریخی ڈبل سنچری اسکور کی۔ گرمی اور درد سے لڑتے ہوئے میکسویل نے آسٹریلیا کی پہلی ون ڈے ڈبل سنچری اسکور کی، انہوں نے صرف 128 گیندوں پر 21 چوکوں اور 10 چھکوں کی مدد سے ناقابل شکست 201 رن بنائے جبکہ پیٹ کمنز نے ناٹ آؤٹ 12 رن بنائے اور اپنی ٹیم کو 3 وکٹوں سے فتح دلائی۔ راشد خان، نوین الحق اور عظمت اللہ عمرزئی نے دو دو وکٹیں حاصل کیں۔

اب آٹھ میچوں میں چھ جیت اور 12 پوائنٹس کے ساتھ آسٹریلیا بھارت اور جنوبی افریقہ کے ساتھ سیمی فائنل میں ہے۔ افغانستان کو جنوبی افریقہ کا مقابلہ کرنا ہے اور وہاں اس کی جیت اس کی سیمی فائنل کی امیدیں زندہ رکھے گی۔

ہندوستھان سماچار/

/عطاءاللہ