نئی دہلی، 29 دسمبر (ہ س)۔ ہندوستانی خواتین کی ہاکی ٹیم نے سال 2023 میں شاندار کارکردگی کا مظاہرہ کیا ہے۔ اگرچہ وہ پیرس 2024 اولمپک گیمز کے لیے براہ راست کوالیفائی کرنے سے محروم رہے، لیکن جھارکھنڈ خواتین ایشین چیمپئنز ٹرافی رانچی 2023 جیتنے کے لیے واپسی کی۔ مزید برآں، انہوں نے اپنی اب تک کی بہترین ایف آئی ایچ عالمی درجہ بندی حاصل کی ہے، جو ان کی محنت اور لگن کا منہ بولتا ثبوت ہے۔
ہانگژو 2022 کے ایشیائی کھیلوں میں طلائی تمغہ جیتنے پر اپنی توجہ مرکوز کرنے کے ساتھ، ہندوستانی ٹیم نے سال کی شروعات جنوری میں جنوبی افریقہ اور نیدرلینڈ کے خلاف وارم اپ میچوں کے ساتھ کیا اور اس کے بعد مئی 2023 میں آسٹریلیا کے تین میچوں کے لئے دورہ کیا۔ اس کے بعد انہوں نے ٹیراسا میں 4 نیشنز انویٹیشن ٹورنامنٹ میں حصہ لیا جہاں وہ میزبان اسپین اور انگلینڈ کے خلاف ناقابل شکست رہے۔
ایکشن سے بھرپور 2023 کے پہلے ہاف کے بعد، ہندوستانی خواتین کی ہاکی ٹیم نے اگست 2023 میںصلالہ میں منعقدہ ہاکی 5 ایشیا کپ جیت لیا۔ وہ مضبوط رفتار کے ساتھ ایشین گیمز میں داخل ہوئے۔ وہ ٹورنامنٹ کے پول مرحلے میں ناقابل شکست رہے، لیکن سیمی فائنل میں چین کے خلاف 0-4 سے ہار گئے، اس طرح گولڈ میڈل میچ سے محروم ہو گئے اور بالآخر پیرس 2024 اولمپک گیمز کے لیے براہ راست اہلیت حاصل کرنے کی دوڑ سے باہر ہو گئے۔ تاہم وہ کانسہ کا تمغہ لے کر چین سے وطن واپس آئے۔
قابل ذکر سال کو یاد کرتے ہوئے، ہندوستان کی ٹاپ گول کیپر اور کپتان سویتا نے ہاکی انڈیا کی طرف سے جاری کردہ ایک سرکاری بیان میں کہا،”یہ ایک حیرت انگیز سال رہا ہے، ہمارے اتار چڑھاو¿ آئے ہیں لیکن ایک ٹیم کے طور پر ہم مضبوط ہوتے جارہے ہیں۔ پیرس 2024 کے لیے براہ راست کوالیفائی کرنے سے محروم رہنا افسوسناک ہے۔ لیکن یہ اس کھیل کا حصہ ہے۔ہم نے اس ناکامی کو پیچھے چھوڑ دیا ہے اور اپنے ہدف پر توجہ مرکوز کر رہے ہیں“۔
ہندوستان نے اس کے بعد جھارکھنڈ ویمنز ایشین چیمپئنز ٹرافی رانچی 2023 کے فائنل میں جاپان کے خلاف 4-0 سے شاندار جیت حاصل کی اور نومبر میں اپنی بہترین ایف آئی ایچ عالمی رینکنگ (2368.83 پوائنٹس کے ساتھ نمبر 6) حاصل کی۔
سویتا نے کہا،”ہم سال کا اختتام شاندار طریقے سے کر رہے ہیں؛ رانچی میں ایشین چیمپئنز ٹرافی میں ہم نے شاندار کارکردگی کا مظاہرہ کیا۔ ہم ٹورنامنٹ میں ناقابل شکست رہے اور سال بھر میں بہت کچھ سیکھا۔ ہم عالمی درجہ بندی میں چھٹے نمبر پر ہیں۔ جو کہ ہماری اب تک کی سب سے اونچی رینکنگ ہے، اس لیے یہ وہ چیز ہے جو ہمیں نئے سال میں داخل ہوتے ہی ایک بڑا فروغ دے گی۔“
یہ 2024 کی ایک مصروف شروعات ہوگی کیونکہ ہندوستان جنوری میں ہونے والے اہم ایف آئی ایچ ہاکی اولمپک کوالیفائر رانچی 2024 اور ایف آئی ایچ ہاکی فائیو-اے-سائیڈ ورلڈ کپ عمان 2024 میں حصہ لے گا۔ وہ فروری سے اڈیشہ میں ایف آئی ایچ پرو لیگ 2023/24 سیزن میں بھی واپس آئیں گے۔
سویتا نے کہا،”یہ یقینی طور پر نئے سال کی ایک مصروف شروعات ہوگی۔ ہم فی الحال ایف آئی ایچ ہاکی اولمپک کوالیفائر رانچی 2024 پر توجہ مرکوز کر رہے ہیں اور قومی کیمپ میں بہت محنت کر رہے ہیں۔ ہم اسی مقام پر کھیلیں گے جہاں ہم نے حال ہی میں ایشین چیمپئنز ٹرافی جیتی ہے، اس لیے ہمارے پاس رانچی کی اچھی یادیں ہیں۔ ہم ایک دلچسپ 2024 کے منتظر ہیں۔“
ہندوستھان سماچار
