نئی دہلی ، 5 دسمبر (ہ س)۔
ہندوستان نے 23 نومبر سے 4 دسمبر تک یریوان، آرمینیا میں منعقد ہونے والی 2023 آئی بی اے جونیئر ورلڈ باکسنگ چمپئن شپ میں 17 تمغوں کے ساتھ اپنی مہم کا اختتام کیا۔ ہندوستان کی نوجوان باکسر پائل ، نشا اور اکانشا نے شاندار کارکردگی کا مظاہرہ کرتے ہوئے طلائی تمغہ جیتا۔پائل نے لڑکیوں کے 48 کلوگرام کے فائنل میں متفقہ فیصلے سے آرمینیا کی مقامی پسندیدہ پیٹروسیان ہیگن کو شکست دے کر باوقار چیمپئن شپ میں ہندوستان کو پہلا گولڈ میڈل دلایا۔
بعد میں ، ایشین یوتھ چیمپئنز نشا اور اکانشا نے توقعات پر پورا اترا۔ نشا ( 52 کلوگرام ) اور اکانشا ( 70 کلوگرام ) نے بالترتیب تاجکستان کی عبد اللوئیفا فارینوز اور روس کی تیمازووا الیزاویتا کو 5-0 کے یکساں مارجن سے شکست دی۔
دریں اثنا ، فائنل کے دن، تین دیگر لڑکیوں – ونی ( 57کے جی ) ، سریشتی ( 63کے جی ) اور میگھا ( 80کے جی ) نے اپنے متعلقہ گولڈ میڈل میچ ہارنے کے بعد چاندی کے تمغے جیتے۔لڑکوں کے زمرے میں ، ساحل ( 75 کلوگرام ) اور ہیمنت ( 80 کلوگرام ) نے اپنے متعلقہ فائنل میں 0-5 سے ہارنے کے بعد ہندوستانی ٹیم میں چاندی کے تمغے کا اضافہ کیا۔ جتن ( 54 کلوگرام) نے بھی ایک سنسنی خیز مقابلے میں 1-4 سے ہارنے سے پہلے قازقستان کے تلبیک نورسل کے خلاف سخت چیلنج پیش کیا۔ہندوستان نے اس باوقار مقابلے پر غلبہ حاصل کیا کیونکہ 26 رکنی ٹیم نے 17 تمغے جیتے جن میں تین سونے ، نو چاندی اور پانچ کانسی کے تمغے شامل تھے۔ مجموعی طور پر ، 12 ہندوستانیوں نے فائنل کے لیے کوالیفائی کیا، جو اس ایڈیشن میں کسی بھی دوسرے ملک سے زیادہ ہے۔
ہندوستھان سماچار
