نئی دہلی ،07دسمبر (ہ س )۔
اگلے سال کے فیفا ورلڈ کپ سے پہلے، لیونل میسی نے ایک بار پھر اپنی صلاحیتوں کا مظاہرہ کیا اور انٹر میامی کو میجر لیگ سوکر (ایم ایل ایس) کپ فٹ بال ٹورنامنٹ جیتنے میں اہم کردار ادا کیا۔ فائنل صرف انٹر میامی اور وینکوور وائٹ کیپس کے درمیان مقابلہ نہیں تھا بلکہ جرمن اسٹار تھامس مولر اور ارجنٹائن کے میسی کے درمیان بھی مقابلہ تھا۔ مولر عام طور پر میسی اور مولر کے درمیان ہونے والی دشمنی میں غالب رہے ہیں، لیکن اس بار ارجنٹائن کے کھلاڑی فتح یاب ہوئے۔
مولر اور میسی کے درمیان ہونے والی 10 ملاقاتوں میں سے جرمن اسٹار نے سات میں کامیابی حاصل کی ہے۔ مولر کی قیادت میں جرمن ٹیم ورلڈ کپ میں میسی اور ارجنٹائن کو دو دو بار باہر کر چکی ہے۔ تاہم، ایم ایل ایس فائنل میں، ارجنٹائن کے سپر اسٹار نے انٹر میامی کو مولر کے وینکوور وائٹ کیپس پر 3-1 سے فتح دلائی۔ میسی نے اس طرح اپنے تیسرے میجر لیگ سوکر سیزن کا اختتام اپنے کیریئر کی 47 ویں ٹرافی کے ساتھ کیا۔
میسی نے 72ویں منٹ میں روڈریگو ڈی پال کو گیند فراہم کی۔ اس کے بعد اس نے اسٹاپیج ٹائم میں ایک اور گول کر کے انٹر میامی کو فرنچائز کی تاریخ میں پہلی چمپئن شپ دلائی۔ میسی اور مولر دونوں ورلڈ کپ اور چیمپئنز لیگ کے فاتح ہیں۔ دونوں کلب ورلڈ کپ کے فاتح ہیں۔ میسی نے میچ کے بعد کہا، تین سال پہلے میں نے ایم ایل ایس میں آنے کا فیصلہ کیا تھا، اور آج ہم ایم ایل ایس چیمپئن ہیں، پچھلے سال ہم لیگ میں جلد ہی باہر ہوگئے تھے، لیکن اس سال ایم ایل ایس جیتنا ہمارا بنیادی ہدف تھا۔
ہندوستھان سماچار
ہندوستان سماچار / عطاءاللہ
