نئی دہلی، 27 نومبر (ہ س)۔ اپنے پہلے ایڈیشن کی شاندار کامیابی کے بعد الٹی میٹ کھو کھو ایک بڑے اور بہتر دوسرے سیزن کے لیے واپسی کے لیے تیار ہے۔ اڈیشہ کے کٹک میں جواہر لعل نہرو انڈور اسٹیڈیم اس سال 24 دسمبر سے لیگ کی میزبانی کرے گا۔
اس اعلان کو عام کرتے ہوئے، الٹی میٹ کھو کھو کے سی ای او اور لیگ کمشنر تنزنگ نیوہی نے حکومت اڈیشہ اور وزیر اعلیٰ نوین پٹنائک کا ٹورنامنٹ کے لیے مکمل تعاون کے لیے شکریہ ادا کیا۔
نیوہی نے ایک سرکاری بیان میں کہا، ”ہم حکومت اڈیشہ اور وزیر اعلیٰ نوین پٹنائک کا سیزن 2 کے لیے ان کی حمایت کے لیے تہہ دل سے شکریہ ادا کرتے ہیں۔ افتتاحی ایڈیشن کی شاندار کامیابی نے برانڈز کی طرف سے نمایاں دلچسپی حاصل کی ہے اور ہمیں نئے شراکت داروں کو محفوظ بنانے میں مدد کی ہے“۔
نیوہی نے کہا کہ دوسرے سیزن کا فوکس نئے زمانےکے سپر اسٹارز بنانا اور نوجوان ٹیلنٹ کو اجاگر کرنا ہے۔
نیوہی نے کہا،”ہماری توجہ ایسے شراکت داروں کے انتخاب پر مرکوز رہتی ہے جو ہمارے طویل مدتی وژن کا اشتراک کرتے ہیں۔ سیزن 2 کا مقصد مستقبل کی اگلی نسل کے سپر اسٹارز تیار کرنا ہے،خاص طور پر میدان میں نوجوان ٹیلنٹ کی موجودگی کے ساتھ ۔“
الٹی میٹ کھو کھو کا افتتاحی سیزن، جس میں چھ ٹیمیں شامل تھیں، 14 اگست سے 4 ستمبر تک مہاراشٹر کے پونے کے شری شیو چھترپتی اسپورٹس کمپلیکس میں منعقد ہوا۔ اڈیشہ جگرناٹس نے چوٹی کے مقابلے میں تیلگو واریئرز کو 46-45 کے اسکور سے شکست دے کر افتتاحی ایڈیشن جیت لیا۔ تقریباً 41 ملین ناظرین کے ساتھ، الٹی میٹ کھو کھو اس وقت تیسرا سب سے زیادہ دیکھا جانے والا غیر کرکٹ ٹورنامنٹ بن گیا تھا۔
اڈیشہ جگرناٹس الٹی میٹ کھو کھو کے 2023 ایڈیشن میں اپنے تاج کا دفاع کرنے کے لیے واپس آئیں گے۔ وہ گروپ مرحلے کے تین کھیل ہارنے کے بعد ٹیبل میں دوسرے نمبر پر رہے لیکن فائنل میں سب سے کم مارجن سے جیت حاصل کی ۔
اس سال، وہ جواہر لعل نہرو انڈور اسٹیڈیم میں گھریلو ہجوم کو اپنے فائدے کے لیے استعمال کرنا چاہیں گے۔ اس ٹیم میں گزشتہ سال کی رنر اپ تیلگو واریئرز اور چار دیگر ٹیمیں چنئی کوئیک گنز، گجرات جائنٹس، ممبئی پلیئرز دی اور راجستھان واریئرز شامل ہوں گی۔
ٹورنامنٹ کے دوسرے سیزن میں ہندوستان کے ٹاپ 145 کھلاڑی شامل ہوں گے جن میں 16 سے 18 سال کی عمر کے 33 نوجوان شامل ہیں۔ دوسرا سیزن بھی سیزن 1 کی طرح راونڈ رابن اور ناک آو¿ٹ فارمیٹ میں کھیلا جائے گا۔ فکسچر کا اعلان جلد کیا جائے گا۔
ہندوستھان سماچار
