بہارمیں بڑھنے لگی سردی، گیا میں سب سے کم درجہ حرارت، بیگوسرائے سمیت کئی اضلاع میں زہریلی ہوئی ہوا
پٹنہ، 31 اکتوبر (ہ س)۔ مانسون ختم ہونے کے بعد اب بہار میں سردی شروع ہوگئی ہے۔ درجہ حرارت میں کمی سے لوگ رات اور صبح کے اوقات میں ہلکی سردی محسوس کررہے ہیں۔ محکمہ موسمیات کے مطابق آئندہ 10 روز میں سردی مزید بڑھے گی۔ آئندہ تین روز کے بعد کم سے کم درجہ حرارت میں کمی کے آثار ہیں۔ آج منگل کے روز درجہ حرارت میں تبدیلی کے کوئی آثار نظر نہیں آ رہے جبکہ رات کے درجہ حرارت میں کمی کے ساتھ ہلکی سردی محسوس کی جائے گی۔
پیر کے روز گیا میں سب سے کم درجہ حرارت 16.2 ڈگری سیلسیس درج کیا گیا جب کہ دوسرے نمبر پر بانکا رہا۔ یہاں کم سے کم درجہ حرارت 16.7 ڈگری درج کیا گیا۔ محکمہ موسمیات کے مطابق 3 نومبر سے کم سے کم درجہ حرارت میں نمایاں کمی کی پیشن گوئی کی گئی ہے۔
دن کے زیادہ سے زیادہ درجہ حرارت میں روزانہ اتار چڑھاؤ ہورہا ہے۔ راجدھانی پٹنہ میں اتوارکے روز زیادہ سے زیادہ درجہ حرارت 32.7 ڈگری سیلسیس ریکارڈ کیا گیا جبکہ پیر کو 0.2 ڈگری کے اضافے کے ساتھ 32.9 ڈگری سیلسیس درج کیا گیا۔ سیتامڑھی کے پپری میں سب سے زیادہ 35.6 ڈگری سیلسیس درجہ حرارت درج کیا گیا۔ سب سے کم درجہ حرارت مظفر پور میں 29.6 ڈگری رہا۔ ریاست کا اوسط درجہ حرارت 30 سے 32 ڈگری کے درمیان درج کیا گیا۔ منگل کی صبح ریاست کے کئی اضلاع میں دھند چھائی رہی۔
دوسری طرف بہار کے کئی اضلاع میں فضائی آلودگی کے درج کیے گئے ہیں۔ ریکارڈ کے مطابق بیگوسرائے منگل کی صبح سب سے خراب ضلع رہا۔ یہاں 313 اے کیوآئی درج کیا گیا ہے جو بہت زیادہ ہے۔ یہ خراب زمرے میں ہے۔ آٹھ اضلاع میں اے کیوآئی کی سطح 200 سے زیادہ تھی۔ راجگیر میں 291، پورنیہ میں 270، آرہ میں 241، مظفر پور میں 235، راجدھانی پٹنہ میں 232، موتیہاری میں 220، سمستی پور میں 214 اور کٹیہار میں 207 اے کیو آئی درج کیا گیا ہے ۔
ہندوستھان سماچار/ افضل
/شہزاد
