خالصتانی تبصرے کو لے کربھوانی پور تھانے میں درج ہوئی پہلی ایف آئی آر
کولکاتا، ۔ شمالی 24 پرگنہ کے سندیشکھالی میں بی جے پی لیڈروں کے ذریعہ ایک سکھ پولیس افسر کو خالصتانی کہنے پر پہلی ایف آئی آر درج کرائی ہے۔ بی جے پی قائدین بشمول لیڈر حزب اختلاف شبھیندو ادھیکاری پر ڈیوٹی پر موجود ایک آئی پی ایس افسر کے خلاف ’’خالصتانی‘‘ ریمارکس کرنے کا الزام لگا تھا۔ اب اس معاملے میں کولکاتا کے بھوانی پور پولیس اسٹیشن میں ایف آئی آر درج کرائی گئی ہے۔ ایف آئی آر جمعہ کی دیر شام درج کی گئی۔
اپوزیشن لیڈر شبھیندو ادھیکاری کی قیادت میں بی جے پی ممبران اسمبلی کا ایک وفد گزشتہ منگل کو سندیشکھالی گیا تھا۔ اس وقت ایک سکھ آئی پی ایس افسر جسپریت سنگھ کے خلاف مبینہ طور پر خالصتانی تبصرہ کیا گیا تھا۔ اس واقعہ کی پہلی ایف آئی آر جمعہ کو ریاست میں درج کی گئی۔
پولیس اسٹیشن میں شکایت کرنے والے شخص کا نام گرمیت سنگھ ہے۔ انہوں نے پدما پوکر روڈ پر واقع یوتھ خالصہ کلب کا نام ایڈریس کے طور پر لکھا۔ چارج شیٹ میں گرمیت نے کہا کہ نہ صرف سکھ پولیس افسر کی توہین کی گئی بلکہ فرقہ وارانہ ہم آہنگی کو تباہ کرنے اور مختلف مذاہب کے درمیان تشدد پھیلانے کی بھی کوشش کی گئی۔
ادھر سکھ برادری کی جانب سے وزیراعلیٰ کو لکھے گئے خط میں کہا گیا ہے کہ جب تک ان کے خلاف ایسے تبصرے کرنے والوں کو سزا نہیں ملتی، وہ اپنا پرامن احتجاج جاری رکھیں گے۔ انہوں نے اس بارے میں بات کرنے کے لیے وزیر اعلیٰ سے وقت بھی مانگا ہے۔ سکھ برادری کا وفد وزیر اعلیٰ سے ملاقات کرنا چاہتا ہے۔
