چھاپے کے بعد بیمار ہوئے ایم ایل اے وشواس، اسپتال میں داخل، 72 لاکھ روپے کی نقدی برآمد
کولکاتا، 21 دسمبر (ہ س)۔ ایم ایل اے بائرن بسواس محکمہ انکم ٹیکس کے چھاپے کے درمیان بیمار ہو گئے ہیں۔ جسمانی حالت بگڑنے کی وجہ سے انہیں بدھ کی رات سے نرسنگ ہوم میں داخل کرایا گیا ہے۔
بدھ کی صبح تقریباً 6 بجے انکم ٹیکس کے اہلکار شمشیر گنج میں بائرن کے گھر گئے۔ اس کے بعد سے ایم ایل اے کے گھر کی تلاشی لی جارہی ہے۔ خاندانی ذرائع کے مطابق رات 10 بجے کے قریب مرکزی ایجنسی کے اہلکاروں نے دستاویزات کے بارے میں پوچھ گچھ شروع کی۔ بائرن تب سے بیمار ہیں۔ اس وقت ڈاکٹر ان کے گھر لائے گئے لیکن ان کی جسمانی حالت بگڑ گئی جس کے بعد انہیں اسپتال لے جایا گیا۔
انکم ٹیکس حکام اب بھی بائرن کے گھر کی تلاشی لے رہے ہیں۔ رات کو ایم ایل اے کے گھر تکے اور کمبل لائے گئے تھے۔ مانا جا رہا ہے کہ یہ انکم ٹیکس حکام کے لیے لائے گئے تھے۔ مرکزی ایجنسی کے ذرائع کے مطابق بائرن کے گھر سے اب تک 72 لاکھ روپے نقدی کا پتہ چلا ہے۔
کئی انکم ٹیکس افسران نے گھر کے علاوہ ایم ایل اے کی بیڑی فیکٹری، اسکول اور اسپتال کی بھی تلاشی لی۔ گھر پر تلاشی مہم کے دوران ایم ایل اے کے اہل خانہ سے بھی پوچھ گچھ کی گئی۔ دوپہر کو پوچھ گچھ کے بعد بائرن کے والد بابر بسواس کو گھر سے باہر نکلتے اور انکم ٹیکس حکام کی تعریف کرتے ہوئے دیکھا گیا۔ جیسے ہی وہ باہر آئے تو میڈیا کے نمائندوں نے ان سے انکم ٹیکس حکام کی پوچھ گچھ کے بارے میں سوالات کرنا شروع کر دیے۔ انہوں نے دعویٰ کیا کہ انکم ٹیکس حکام ان کے ساتھ باپ جیسا سلوک کر رہے ہیں۔
ہندوستھان سماچار
/شہزاد
