بنگال میں چار نئے ہوٹل کھولے گی آئی ٹی سی، ڈیری پروجیکٹ اور اسپتالوں کی تعمیر کا بھی اعلان
کولکاتا، 22 نومبر (ہ س)۔ مختلف کاروباروں سے منسلک کمپنی آئی ٹی سی لمیٹڈ مغربی بنگال میں چار نئے ہوٹل کھولے گی۔ گروپ کے چیئرمین اور منیجنگ ڈائریکٹر (سی ایم ڈی) سنجیو پوری نے یہ جانکاری دی ہے۔
مغربی بنگال میں منگل کو شروع ہوئے بنگال گلوبل بزنس سمٹ (بی جی بی ایس) کے ساتویں ایڈیشن سے خطاب کرتے ہوئے انہوں نے کہا کہ کمپنی مستقبل قریب میں ریاست میں اپنا 18 واں مینوفیکچرنگ یونٹ بھی قائم کرے گی۔ حالانکہ انہوں نے آئی ٹی سی کے اعلان کردہ منصوبوں کے بارے میں تفصیل سے نہیں بتایا۔ پوری نے کہا، ’’ہمارے پاس بنگال میں 17 مینوفیکچرنگ یونٹ ہیں۔ مستقبل قریب میں ایک اور شروع کیا جائے گا۔ ریاست میں ہمارے پانچ ہوٹل ہیں۔ وقت کے ساتھ آئی ٹی سی ان کی تعداد نو تک لے جانے والی ہے۔‘‘
پوری نے کہا کہ سگریٹ سے صابن بنانے والی بڑی کمپنی نے پچھلے کچھ سالوں میں مغربی بنگال میں تقریباً سات ہزار کروڑ روپے کی سرمایہ کاری کی ہے۔ وہیں نارائن ہیلتھ کے چیئرمین دیوی پرساد شیٹی نے کہا کہ کمپنی اگلے دو سالوں میں کولکاتا میں 1,000 بستروں کا جدید ترین ہسپتال قائم کرنے کا منصوبہ بنا رہی ہے۔ شیٹی نے کہا کہ نارائن ہیلتھ نے اس پروجیکٹ کے لیے ایک ہزار کروڑ روپے رکھے ہیں۔ انہوں نے یہاں بی جی بی ایس میں کہا، ’’ اس شہر میں ایک سپر اسپیشلٹی اسپتال بنانا میرا خواب ہے۔ یہ جدید دل کی دیکھ بھال، کینسر کی دیکھ بھال اور اعضاء کی پیوند کاری کی سہولیات فراہم کرے گا۔‘‘
آر پی ایس جی گروپ کے چیئرمین سنجیو گوینکا نے اس تقریب میں کہا کہ گروپ کولکاتا میں عالمی معیار کا اسپتال بھی قائم کرے گا۔ حالانکہ گوینکا نے اس منصوبے کی تفصیل نہیں بتائی۔ دریں اثنا جے کے پیپر کے منیجنگ ڈائریکٹر ہرش پتی سنگھانیا نے کہا کہ جے کے گروپ کھڑگپور کے ودیا ساگر انڈسٹریل پارک میں ایک ڈیری پروجیکٹ قائم کرے گا۔
ہندوستھان سماچار
/شہزاد
