آئی جی پی جموں زون نے کٹھوعہ میں جرائم و پولیس کے مجموعی کام کاج کا جائزہ لیا
جموں، 17 اکتوبر (ہ س)۔ جموں زون کے انسپکٹر جنرل آف پولیس آنند جین نے کٹھوعہ کے تمام نگران و دیگر پولیس افسران کے ساتھ میٹنگ میں ضلع میں جرائم کی پوزیشن اور مجموعی کام کاج کا جائزہ لیا۔ میٹنگ میں رواں سال کے دوران درج کیے گئے مقدمات اور سابقہ زیر التواء مقدمات کا جائزہ لیا گیا۔
آئی جی پی آنند جین پہلی بار ڈی آئی جی جے کے ایس رینج شکتی پاٹھک کے ساتھ کٹھورہ پہنچے جہاں انہیں گارڈ آف آنر پیش کیا گیا۔ اپنے پہلے دورے میں آئی جی پی جموں زون نے تمام افسران سے بات چیت کی۔ اُنہوں نے ضلع میں جرائم و دیگر مقدمات کا تفصیلی جائزہ لیا اور اس بات پر زور دیا کہ مقدمات کو نمٹانے کے لئے تفتیش کے معیار کو کیسے بہتر بنایا جائے۔ منشیات اور سائیکو ٹراپک مادہ (این ڈی پی ایس) کے مقدمات، گائے کی اسمگلنگ کے مقدمات، جائیداد کے خلاف جرائم و دیگر جرائم، اور تفتیشی کارروائیوں پر توجہ مرکوز کی گئی۔ چوری کے معاملات کے حوالے سے حکمت عملی مرتب کرنے کی ضرورت پر زور دیتے ہوئے آئی جی پی نے کہا کہ رات کی گشت کو بڑھانے اور بیٹ سسٹم کو بھی بہتر بنایا جائے۔
انہوں نے این ڈی پی ایس کے مقدمات اور دیگر نازک نوعیت کے مقدمات کی موثر کارروائی پر بھی زور دیا تاکہ یہ یقینی بنایا جا سکے کہ مقدمات سزا پر ختم ہو جائیں۔ آئی جی پی نے افسران کو بریفنگ دیتے ہوئے عوام کو ریلیف دینے کے لیے زیر التواء مقدمات،عوامی شکایات کو حتمی شکل دینے کا مشورہ دیا اور تفتیشی افسران کو ہدایت کی کہ وہ تفتیش کے لیے تفویض کیے گئے مقدمات کو تیزی سے نمٹائیں۔ انہوں نے افسران سے کہا کہ وہ سی آئی گرڈ کو مضبوط بنائیں اور تھانوں کے کاموں کی موثر نگرانی کے ذریعے پولیس کے بنیادی کام کاج کو متحرک کریں۔ایس ایس پی کٹھوعہ شیودیپ سنگھ جموال نے ایک تفصیلی پاور پوائنٹ پریزنٹیشن دی اور آئی جی پی جموں زون کو ضلع میں کٹھوعہ پولیس کی طرف سے کی جانے والی دیگر سرگرمیوں کے ساتھ ساتھ امن و امان ،جرائم اور سیکورٹی کے حالات کے بارے میں آگاہ کیا۔
انہوں نے سیکیورٹی گرڈ کو مضبوط بنانے اور پولیسنگ کو بہتر بنانے کے لیے اپنائے گئے اقدامات پر بھی روشنی ڈالی ۔دریں اثناء آئی جی پی جموں، آنند جین نے ڈی پی ایل کٹھوعہ میں عوامی تقریب سے خطاب کیا ۔ جس میں ڈی ڈی سی، بی ڈی سی، بزرگ شہریوں، بیوپار منڈل کے ممبران وغیرہ سمیت بڑی تعداد میں معزز لوگوں نے شرکت کی اورعوامی اہمیت کے مختلف مسائل پر روشنی ڈالی۔آئی جی پی نے یقین دلایا کہ پولیس سے متعلق ان کی حقیقی شکایات کو ترجیحی بنیادوں پر حل کیا جائے گا۔
ہندوستھان سماچار
/شہزاد
