پنجی، 20 نومبر (ہ س)۔ 54 واں انڈین انٹرنیشنل فلم فیسٹیول آج (پیر) سے یہاں گوا کے خوبصورت ساحلوں کے درمیان شروع ہوگا۔ مرکزی وزیر اطلاعات و نشریات انوراگ ٹھاکر ڈاکٹر شیاما پرساد مکھرجی انڈور اسٹیڈیم میں تقریب کا افتتاح کریں گے۔ وزیر اطلاعات و نشریات آئناکس کمپلیکس میں افتتاحی فلم کے پروڈیوسروں اور فنکاروں کو اعزازات سے نوازیں گے۔ وہ فلم بازار کا افتتاح بھی کریں گے۔ یہ جنوبی ایشیا کا سب سے بڑا عالمی فلم مارکیٹ ہے۔ یہ اطلاع پی آئی بی کے جاری کردہ اعلامیہ میں دی گئی ہے۔
افتتاحی تقریب میں مادھوری دیکشت، شاہد کپور، شریا سرن، نصرت بھروچا، پنکج ترپاٹھی، شانتنو موئترا، شریا گھوشال اور سکھویندر سنگھ پرفارم کریں گے۔ فیسٹیول میں فلم انڈسٹری کی معروف شخصیات کیتھرین زیٹا جونز، سلمان خان، ودیا بالن، آیوشمان کھرانہ، انوپم کھیر، وکی کوشل، سدھارتھ ملہوترا، ادیتی راو حیدری، اے آر رحمان، امت ترویدی وغیرہ موجود ہوں گے۔
نو روزہ فیسٹیول کا آغاز برطانوی فلم ساز اسٹورٹ گیٹ کے کیچنگ ڈسٹ کے بین الاقوامی پریمیئر سے ہوگا۔ فیسٹیول کے دوران چار مقامات پر 270 سے زائد فلموں کی نمائش کی جائے گی۔ فیسٹیول میں 13 ورلڈ پریمیئرز، 18 انٹرنیشنل پریمیئرز، 62 ایشیا پریمیئرز اور 89 انڈیا پریمیئرز ہوں گے۔ بہترین ویب سیریز (اوٹی ٹی ) ایوارڈ کے لیے 15 اوٹی ٹی پلیٹ فارمز سے 10 زبانوں میں کل 32 اندراجات موصول ہوئے۔ اس سال 15 فیچر فلمیں (12 بین الاقوامی فلمیں اور تین ہندوستانی فلمیں) باوقار گولڈن پیکاک ایوارڈ کے لیے مقابلہ کریں گی۔ اس کے علاوہ مختلف زبانوں میں ڈب کی گئی انڈین پینورما فلمیں بھی دکھائی جائیں گی۔ افتتاحی تقریب کا براہ راست دوردرشن پر نشر کیا جائے گا۔
ہندوستھان سماچار
