نئی دہلی: 21 نومبر(ہ س)۔ گزشتہ 46 دنوں سے غزہ اور مغربی کنارے میں میں اسرائیل کی وحشیانہ کاروائی اورغزہ میں جاری قتل کو انسانیت کے چہرے پر وہ بدنما داغ قرار دیتے ہوئے آج دہلی میں انڈین مسلمس فار سول رائٹس (آئی ایم سی آر) کے چیئرمیں اور سابق رکن پارلیمنٹ ( راجیہ سبھا ) محمد ادیب نے بھارت میں ترکیہ کے سفیر ڈاکٹر فرات سنال سے ترکیہ سفارتخانے میں ملاقات کی۔ بات چیت کے دوران انہوں نے کہا کہ اسرائیل کے اس وحشیانہ قدم کی جتنی بھی مذمت کی جائے وہ کم ہے۔ ملاقات کے دوران محمد ادیب نے رہائشی بستیوں، اسپتالوں، اور پناہ گزیں کیمپوں کو اسرائیلی فوج کی جانب نشانہ بنائے جانے پر عالمی برادری، اقوام متحدہ کی بے بسی اور خاص کر عرب ممالک کی خاموشی پر سخت تشویش کا اظہار کیا۔
محمد ادیب نے سفیر سے مخاطب ہو کر کہا کہ ترکیہ کے صدر رجب طیب اردگان نے جس طرح سے فلسطینی عوام خاص کر حماس پر اپنے موقف کو واضح کیا ہے اس کی جتنی ستائش کی جائے وہ کم ہے۔ ملاقات کے دوران ترکیہ کے سفیر نے بتایا کہ ترکیہ فلسطینیوں کو ہر ممکن امداد فراہم کرانے میں مصروف ہے۔ مگر اسرائیل امدادی سامان غزہ تک پہنچنے نہیں دے رہاہے۔ انہوں نے کہا کہ اس وقت فلسطینی عوام کو مدد کی سخت ضرورت ہے اور ہمارا ملک اس کوشش میں ہے کہ عالمی دباؤ ڈلوا کر فلسطینی عوام تک جلد از جلد مدد پہونچائی جا سکے۔
دوران گفتگو آئی ایم سی آر کے چیٔرمین نے کہا کہ اس وقت بھارت کا مسلمان ہی نہیں دنیا بھر کے انصاف پسند لوگ غزہ کے حالات پر ترکیہ کی جانب ٹک ٹکی باندھ کر دیکھ رہے ہیں۔ انہوں نے کہاکہ آج کے اس دور میں جبکہ سارے مسلم ممالک امریکہ کے ڈر، کسی خوف یا کسی اور وجہ سے خاموش ہیں، انہیں فلسطینی مظلوم عوام اور بچوں کی سسکیاں اور چیخ و پکار سنائی نہیں دیتی ہے، ہر دس منٹ پر ایک معصوم بچے کی موت ہوتی ہے، عالمی جنگ کے دوران بھی اس طرح سے اور اتنے بڑے پیمانے پر قتل عام نہیں ہوا تھا۔ دنیا بھر کے انصاف پسند لوگ اور حکومتیں جو انسانیت پر یقین رکھتے ہیں انہوں نے اس بربریت کے خلاف آواز اٹھائی ہے لیکن عرب اور خلیجی ممالک کی خاموشی نہ صرف حیران کن ہے بلکہ سنگین تشویش پیدا کرتی ہے۔
ملاقات کے دوران محمد ادیب نےترکیہ کے سفیر کو انڈین مسلم فار سول رائٹس کے بارے میں تفصیلی معلومات فراہم کیں ۔ انہوں نے کہاکہ یہ ایک غیر سرکاری تنظیم ہے جو ملک میں انسانی حقوق کے مسائل پر کام کر رہی ہے ۔ اس دوران انہوں نے ترکیہ کے سفیر سے گزارش کی ہے کہ دسمبر کے پہلے عشرے میں انڈین مسلم فار سول رائٹس کے زیراہتمام موجودہ دور میں درپیش انسانی المیہ کے تناظر میں ایک اہم سیمینار بعنوان ‘انسانی حقوق اور اقوام متحدہ کی معنویت’ پر دہلی میں منعقد کیا جا رہاہے، اسمیں شرکت فرمائیں۔ اس میں سیاسی جماعتوں کے سرکردہ لیڈران، مختلف ممالک کے سفراء، ملک میں انسانی حقوق سے جڑے اداروں کے سربراہان، انسانی حقوق کے کارکنوں سمیت بڑی تعداد میں شرکاء شرکت کریں گے۔
ملاقات کے دوران محمد ادیب نے ترکیہ کے سفیر کو بھی اس پروگرام میں نہ صرف شرکت کی دعوت دی بلکہ بحیثیت مقرر انہیں مدعو کیا۔ جسے ترکیہ کے سفیر نے بخوشی قبول بھی کر لیا۔ ملاقات کے دوران محمد ادیب کے ہمراہ معروف صحافی اور انڈو مڈل ایسٹ کلچرل فورم کے سیکریٹری جنرل انظرالباری رفیقی اور سماجی کارکن طلعت ادیب بھی موجود رہیں۔
ہندوستھان سماچار/ عبدالواحد
