دہلی-این سی آر گھنے کہرے کی گرفت میں، ہوا بھی ہوئی زہریلی
نئی دہلی، 31 جنوری (ہ س)۔ قومی راجدھانی دہلی اور سرحدی ریاستوں کے شہر شدید سردی کی گرفت میں ہیں۔ دہلی، نوئیڈا، غازی آباد، گروگرام اور فرید آباد میں آج صبح گھنا کہرا چھایا رہا۔ صبح 4.30 بجے سے صبح 6 بجے کے درمیان حد نگاہ نہ کے برابر رہی۔ راجدھانی دہلی کے دھولا کنواں کرتویہ پتھ، لال قلعہ علاقہ کے علاوہ نوئیڈا اور گروگرام کے سائبر سٹی علاقے کہرے میں ڈوبے رہے۔
اس سال جنوری 2024 میں دہلی کے لوگوں نے نہ صرف سخت سردی کو برداشت کیا بلکہ پچھلے کچھ سالوں کے مقابلے زیادہ آلودہ ہوا میں سانس بھی لی۔ نہ صرف انتہائی خراب زمرے کے ایئر انڈیکس والے دن بڑھ گئے بلکہ ایک بھی دن ’’درمیانی‘‘ اور’’اطمینان بخش‘‘ زمرے کی ہوا نہیں ملی۔ ماہ کا اوسط ایئر انڈیکس بھی جنوری 2016 کے بعد سب سے زیادہ ریکارڈ کیا گیا۔
مرکزی آلودگی کنٹرول بورڈ کے مطابق دہلی کا اے کیو آئی اس سال جنوری میں دو دن تک 400 سے اوپر رہا یعنی ’’شدید‘‘ زمرے میں رہا۔ 27 دن 300 اور 400 کے درمیان ’’بہت خراب‘‘، جبکہ ایک دن 200 سے 300 کے درمیان یعنی ’’خراب زمرے میں درج ہوا۔ کسی بھی دن ایئر انڈیکس 200 سے نیچے نہیں گیا تھا۔
بورڈ نے مئی 2015 سے ایئر انڈیکس کی پیمائش شروع کی تھی، تب سے اب تک اس سال دوسرا آلودہ جنوری رہا ہے۔ مرکزی آلودگی کنٹرول بورڈ کے مطابق منگل کو دہلی کا مجموعی اے کیو آئی357 رہا۔ اس سطح کی ہوا کو ’’ بہت خراب‘‘ زمرے میں رکھا جاتا ہے۔ پیر کو یہ 356 تھا۔
اور ایک خاص بات یہ ہے کہ قومی راجدھانی دہلی میں اس ماہ 30 جنوری تک اوسط زیادہ سے زیادہ درجہ حرارت 17.7 ڈگری سیلسیس رہا، جو 13 سال میں سب سے کم ہے۔ ہندوستان کے محکمہ موسمیات کے اعداد و شمار کے مطابق اس عرصے کے دوران قومی دارالحکومت میں اوسطاً کم از کم درجہ حرارت 6.2 ڈگری سیلسیس ریکارڈ کیا گیا، جو 13 سالوں میں دوسرا سب سے کم درجہ حرارت ہے۔
کل (منگل) کی صبح دہلی کے کچھ حصوں میں کہرا چھایا ہوا تھا اور صفدرجنگ آبزرویٹری میں کم سے کم درجہ حرارت 11.4 ڈگری سیلسیس ریکارڈ کیا گیا۔ ہندوستان کے محکمہ موسمیات کے مطابق صبح 8.30 بجے نسبتاً نمی 100 فیصد ریکارڈ کی گئی۔ دھند کی وجہ سے سڑک، ریل اور فضائی ٹریفک پر بڑا اثر پڑا ہے۔
