نئی دہلی، 03 نومبر (ہ س)۔ وزیر اعظم نریندر مودی نے جمعہ کو کہا کہ ہندوستان کے فوڈ پروسیسنگ شعبے نے گزشتہ نو سالوں میں 50,000 کروڑ روپے کی ایف ڈی آئی کو راغب کیا ہے۔ وزیر اعظم نے یہ بات نئی دہلی کے پرگتی میدان میں ‘بھارت منڈپم’ میںایک بڑے فوڈ ایونٹ ’ورلڈ فوڈ انڈیا 2023‘ کے دوسرے ایڈیشن کا افتتاح کرتے ہوئے کہی۔
وزیراعظم نے کہا کہ ذائقہ اور ٹیکنالوجی کا یہ امتزاج ایک نئے مستقبل کو جنم دے گا اور نئی معیشت کو رفتار دے گا۔ اس بدلتے وقت میں، 21ویں صدی میں غذائی تحفظ ایک بڑا مسئلہ ہے اور اسی لیے ورلڈ فوڈ انڈیا جیسے ایونٹ اہم ہیں۔
انہوں نے کہا کہ ہندوستان میں پراسیسڈ فوڈ انڈسٹری کو اب ایک ابھرتے ہوئے شعبے کے طور پر دیکھا جا رہا ہے۔ پچھلے نو سالوں میں اس شعبے کو 50,000 کروڑ روپے کی ایف ڈی آئی ملی ہے۔ یہ حکومت ہند کی صنعت نواز اور کسان نواز پالیسیوں کی وجہ سے ہے۔ ہم نے فوڈ پروسیسنگ سیکٹر کے لیے پی ایل آئی اسکیم شروع کی ہے۔
انہوں نے کہا کہ ملک کی خواتین میں فوڈ پروسیسنگ انڈسٹری کی قیادت کرنے کی قدرتی صلاحیت موجود ہے۔ اس کے لیے کاٹیج انڈسٹریز اورایس ایچ جی ایس کو ہر سطح پر خواتین کے لیے فروغ دیا جا رہا ہے۔ وزیر اعظم نے کہا کہ ہندوستان میں اتنا ہی ثقافتی تنوع ہے جتنا کہ کھانے کا تنوع ہے۔ آج جس طرح سے پوری دنیا میں ہندوستان کے تئیں تجسس بڑھ گیا ہے، وہ آپ سب کے لیے ایک بہت بڑا موقع بھی لے کر آیا ہے۔
ہندوستھان سماچار
