پارلیمنٹ کی سیکورٹی میں چوک کا کلیدی سازشی للت جھا گرفتار
نئی دہلی، 15 دسمبر (ہ س)۔ پارلیمنٹ کی سیکورٹی میں چوک کاکلیدی سازشی للت جھا کو دہلی پولیس نے پکڑ لیا ہے۔ بی جے پی آئی ٹی سیل کے سربراہ امت مالویہ نے تقریباً سات گھنٹے پہلے ایکس ہینڈل پر للت جھا کی گرفتاری کے بارے میں اہم معلومات شیئر کی ہیں۔
دہلی پولیس نے کہا ہے کہ للت جھا نے جمعرات کی رات خودسپردگی کی۔ اس سے پوچھ گچھ کی جارہی ہے۔ پولیس نے للت کی تلاش میں کئی جگہوں پر چھاپے مارے تھے۔ پولیس اس واقعے کے سلسلے میں پہلے ہی کئی ملزمان کو گرفتار کر چکی ہے۔ ملزمان کے خلاف دہلی میں تعزیرات ہند اور غیر قانونی سرگرمیاں (روک تھام) ایکٹ (یو اے پی اے) کی مختلف دفعات کے تحت مقدمہ درج کیا گیا ہے۔
یہ واقعہ بدھ کی دوپہر کو پیش آیا۔ پریزائیڈنگ آفیسر راجندر اگروال لوک سبھا میں وقفہ سوال کی کارروائی کو چلارہے تھے۔ مالدہ نارتھ سے بی جے پی ایم پی کھگین مرمو اپنی بات رکھ رہے تھے۔ تبھی دو افراد سامعین گیلری سے نیچے کود پڑے۔ نیلی جیکٹ پہنے ایک شخص نے ارکان اسمبلی کی نشستوں پر چھلانگیں لگانا شروع کر دیں۔ وہ تقریباً تین قطاریں عبور کر کے اسپیکر کی کرسی کی طرف جانے لگا۔
افراتفری کے ماحول کے درمیان کچھ اراکین اسمبلی نے ہمت دکھاکر انہیں گھیر لیا۔ مارشل بھی دوڑتا ہوا آیا۔ پھر نوجوان نے جوتے کے اندر سے کوئی چیز نکالی۔ اس کے بعد وہاں سے پیلا دھواں اٹھنے لگا۔ بعد میں اراکین پارلیمنٹ اور مارشلز نے مل کر دونوں کو پکڑ لیا جس کے بعد پریذائیڈنگ افسر نے کارروائی ملتوی کر دی تھی۔
ہندوستھان سماچار
/شہزاد
