وزیر اعظم مودی آج چترکوٹ کے دورے پر
نئی دہلی، 27 اکتوبر (ہ س)۔ وزیر اعظم نریندر مودی آج (جمعہ) چترکوٹ کا دورہ کریں گے۔ وہ دوپہر تقریباً 1:45 بجے مدھیہ پردیش کے ستنا ضلع کے جانکی کنڈ (چترکوٹ) میں واقع شری سد گرو سیوا سنگھ ٹرسٹ میں منعقد پروگراموں میں شرکت کریں گے۔ اس کے علاوہ وزیر اعظم مودی رگھوبیر مندر میں پوجا ارچنا اور درشن کریں گے۔ وہ شری رام سنسکرت مہاودیالیہ جائیں گے۔ اس کے علاوہ آنجہانی شری اروند بھائی مفتلال کی سمادھی پر گلہائے عقیدت پیش کرنے کے بعد وہ جانکی کنڈ اسپتال کی نئی شاخ (سیل) کا افتتاح کریں گے۔
اس دوران وزیر اعظم مودی آنجہانی شری اروند بھائی مفتلال کی صد سالہ یوم پیدائش تقریبات کے موقع پر منعقدہ عوامی پروگرام میں بھی شرکت کریں گے۔ شری سدگرو سیوا سنگھ ٹرسٹ سن 1968 میں سنت رنچھوڑ داس جی مہاراج نے قائم کیا تھا۔ شری اروند بھائی مفتلال مہاراج سے متاثر تھے۔ انہوں نے ٹرسٹ کے قیام میں اہم کردار ادا کیا۔
شری اروند بھائی مفتلال ملک کی آزادی کے بعد ہندوستان کے سرکردہ کاروباریوں میں سے ایک تھے۔ انہوں نے ملک کی ترقی کی کہانی میں اہم کردار ادا کیا۔ وزیر اعظم اپنے چترکوٹ دورے کے دوران تلسی پیٹھ بھی جائیں گے۔ وہ تقریباً 3:15 بجے کانچ مندر میں پوجا ارچنا کریں گے۔ وہ تلسی پیٹھ کے جگد گرو راماننداچاریہ کا آشیرواد بھی لیں گے اور ایک عوامی تقریب میں شرکت کریں گے۔ یہاں وہ تین کتابیں ’’اشٹادھیائے بھاشیہ‘‘، ’’راماننداچاریہ چریتم‘‘ اور ’’بھگوان شری کرشن کی راشٹرلیلا‘‘ کا اجراء کریں گے۔ تلسی پیٹھ کو جگد گرو رام بھدراچاریہ نے 1987 میں قائم کیا تھا۔
ہندوستھان سماچار
/شہزاد
