مرزا پور، 21 اکتوبر (ہ س)۔ لال گنج تھانہ علاقہ کے گیگ پورہ روڈ پر کشیارا فال کے قریب ہفتہ کو زائرین سے بھری ایک بے قابو پک اپ حادثہ کا شکار ہو گئی۔ پک اپ پر سوار زائرین وجے پور اور وندھیاچل جا رہے تھے۔ حادثے میں کل 33 زائرین زخمی ہوگئے۔ پولیس نے موقع پر پہنچ کر زخمیوں کو کمیونٹی ہیلتھ سنٹر پہنچایا۔
ابتدائی طبی امداد کے بعد میڈیکل سپرنٹنڈنٹ ڈاکٹر سنجے سنگھ نے 17 زخمیوں کی سنگین حالت کو دیکھتے ہوئے انہیں ڈویژنل اسپتال ریفر کر دیا۔ ڈویژنل اسپتال پہنچنے تک دو افراد کی موت ہو گئی، جبکہ تین کو تشویشناک حالت میں ٹراما سنٹر وارانسی ریفر کر دیا گیا۔
کل 33 زائرین لال گنج تھانہ علاقہ کے گڑبڑ گاؤں سے پک اپ میں وجے پور اور وندھیاچل دھام جا رہے تھے۔ لال گنج-گپورہ روڈ پر کشیارا فال کے قریب سامنے سے آرہے ٹریکٹر کو بچانے کی کوشش کے دوران پک اپ غیر متوازن ہو کر الٹ گئی اور اس میں سوار تمام افراد زخمی ہو گئے۔
لال گنج پولیس اسٹیشن کے انچارج اجیت سریواستو نے بتایا کہ حادثے میں کل 33 زائرین زخمی ہوئے ہیں۔ ان میں سے دو زائرین کی موت ہو گئی ہے اور تین زخمیوں کو ٹراما سینٹر بی ایچ یو وارانسی بھیج دیا گیا ہے۔ 16 زخمی لال گنج سی ایچ سی میں زیر علاج ہیں اور دیگر زخمیوں کا علاج ڈویژنل اسپتال میں کیا جا رہا ہے۔
ہندوستھان سماچار
/شہزاد
