شملہ، 4 دسمبر (ہ س)۔
دارالحکومت شملہ سے متصل سنی تھانے کے علاقے میں پیر کی صبح ایک پک اپ گاڑی بے قابو ہو کر کھائی میں گر گئی۔ حادثے میں پک اپ میں سوار چھ مزدور ہلاک اور چھ دیگر شدید زخمی ہو گئے۔ زخمیوں کو آئی جی ایم سی اسپتال لے جایا گیا ہے۔
معلومات کے مطابق 12 مزدور پک اپ گاڑی میں سنی سے منڈی جا رہے تھے۔ صبح تقریباً 7 بجے ان کی پک اپ بے قابو ہوگئی اور کراڈ گھاٹ میں کھائی میں گر گئی۔ شملہ سے تقریباً 35 کلومیٹر دور حادثے کی اطلاع ملتے ہی پولیس موقع پر پہنچ گئی اور راحت اور بچاو¿ کام شروع کیا۔ پولیس نے مقامی لوگوں کی مدد سے لوگوں کو کھائی سے نکالا۔ پک اپ میں سوار تین افراد موقع پر ہی دم توڑ گئے جبکہ تین نے اسپتال میں دم توڑ دیا۔ پولیس زخمیوں کو آئی جی ایم سی اسپتال لے گئی۔
پولیس کے مطابق حادثے کا شکار ہونے والے تمام مزدور کشمیری نژاد ہیں۔ حادثے میں جاں بحق ہونے والے 4 افراد کی شناخت فرید، غلام، شبیر اور طالب کے نام سے ہوئی ہے جب کہ دیگر دو کی شناخت نہیں ہوسکی۔ اے ایس پی شملہ سنیل نیگی نے بتایا کہ جموں و کشمیر کے چھ افراد جو پک اپ میں سفر کر رہے تھے، اس حادثے میں ہلاک ہو گئے ہیں۔ دیگر چھ زخمی آئی جی ایم سی میں زیر علاج ہیں۔ انہوں نے کہا کہ مقدمہ درج کر لیا گیا ہے اور حادثے کی وجوہات کی جانچ کی جا رہی ہے۔
ہندوستھان سماچار
