نئی دہلی، 25 جولائی (ہ س)۔ الیکشن کمیشن نے راجیہ سبھا کے سکریٹری جنرل پی سی مودی کو نائب صدر کے انتخاب کے لیے ریٹرننگ آفیسر مقرر کیا ہے۔ اس کے علاوہ راجیہ سبھا سکریٹریٹ میں جوائنٹ سکریٹری گریما جین اور ڈائریکٹر وجے کمار کو ایسوسی ایٹ ریٹرننگ آفیسر مقرر کیا گیا ہے۔ ریٹرننگ افسران انتخابی عمل کے انعقاد اور نگرانی کے ذمہ دار افسران ہیں۔
الیکشن کمیشن نے جمعہ کو یہ جانکاری دی۔ کمیشن کے مطابق صدر اور نائب صدر کے عہدوں کے لیے انتخابات 1952 کے ایکٹ اور 1974 سے متعلقہ قواعد کے مطابق کرائے جاتے ہیں، اس کے لیے حکومت کی مشاورت سے ریٹرننگ افسر کا تقرر کیا جاتا ہے۔
روایت کے مطابق لوک سبھا یا راجیہ سبھا کے سکریٹری جنرل کو ریٹرننگ آفیسر بنایا جاتا ہے۔ گزشتہ نائب صدر کے انتخاب میں لوک سبھا کے سکریٹری جنرل ریٹرننگ آفیسر تھے۔ اس لیے اس بار راجیہ سبھا کے سکریٹری جنرل کو ریٹرننگ آفیسر بنایا گیا ہے۔ الیکشن کمیشن نے وزارت قانون اور راجیہ سبھا کے ڈپٹی چیئرمین ہری ونش کے ساتھ مشاورت کے بعد اس نام کا فیصلہ کیا ہے۔
قابل ذکر ہے کہ حال ہی میں نائب صدر جگدیپ دھنکھڑ نے خرابی صحت کا حوالہ دیتے ہوئے اپنے عہدے سے استعفیٰ دے دیا تھا۔ اس کے بعد الیکشن کمیشن نے نائب صدر کے عہدے کے لیے انتخابی عمل شروع کر دیا ہے۔
—————
ہندوستان سماچار / عبدالسلام صدیقی
