دہلی – این سی آر بنا گیس چیمبر، ہوا ہوئی مزید زہریلی

دہلی – این سی آر بنا گیس چیمبر، ہوا ہوئی مزید زہریلی

نئی دہلی، 4 نومبر (ہ س)۔ قومی راجدھانی دہلی ایک گیس چیمبر بنی ہوئی ہے۔ دیوالی سے پہلے ہوا تیزی سے زہریلی ہوتی جا رہی ہے۔ سانس اور آنکھوں کو خطرہ ہے۔ امید تھی کہ قانون کا ڈنڈا چلنے کے بعد حکومت کی کوشش سے اگلے روز صورتحال بہتر ہو جائے گی لیکن ایسا نہیں ہوا۔

مرکزی آلودگی کنٹرول بورڈ نے آج (ہفتہ) صبح 4 بجے اعداد و شمار جاری کیے ہیں۔ ان اعداد و شمار کے مطابق دہلی-این سی آر میں ہوا کے معیار کا انڈیکس انتہائی خراب زمرے میں رہا۔ اے کیو آئی (ایئر کوالٹی انڈیکس) 500 سے تجاوز کر گیا۔ اس سے پہلے جمعہ کو دہلی میں سنگین زمرے کے ساتھ 459 اے کیو آئی ریکارڈ کیا گیا تھا۔

سنٹرل پولوشن کنٹرول بورڈ کے مطابق آج ہوا کے معیار کے انڈیکس میں معمولی بہتری آئے گی لیکن اگلے تین دنوں تک ہوا سنگین زمرے میں رہے گی۔ اس لیے فی الحال آلودگی سے زیادہ راحت کا کوئی امکان نہیں ہے۔ اس کی وجہ سے گریڈیڈ رسپانس ایکشن پلان (گریپ) پابندیوں کا چوتھا مرحلہ بھی ایک دو دن میں نافذ ہو سکتا ہے۔

دریں اثنا، ایئر کوالٹی مینجمنٹ کمیشن کی ذیلی کمیٹی نے صورتحال کا جائزہ لیا ہے۔ کمیشن کا کہنا ہے کہ دہلی کا اوسط ایئر انڈیکس 368 تھا۔ ایک وقت دوپہر 12 بجے ایئر انڈیکس 475 تک پہنچ گیا تھا۔ اس کے بعد ایئر انڈیکس میں معمولی بہتری دیکھنے میں آئی۔ اس کی وجہ سے شام پانچ بجے ایئر انڈیکس 456 تھا۔ فی الحال گریڈیڈ رسپانس ایکشن پلان (گریپ) کے تیسرے مرحلے کی پابندیاں نافذ رہیں گی۔ ضرورت پڑنے پر پابندیوں کا چوتھا مرحلہ لاگو کیا جائے گا۔

اس سے قبل کل (جمعہ) صبح 5 بجے کے اعداد و شمار بھی خوفناک تھے۔ ان اعداد و شمار کے مطابق دہلی میں اے کیو آئی سنگین زمرے کے ساتھ 459 تھا۔ نوئیڈا میں یہ سطح 418 تھی۔ غازی آباد کا اے کیو آئی صبح 363 ریکارڈ کیا گیا۔ جمعرات کی شام 5 بجے دہلی کا اوسط اے کیو آئی 402 تھا۔ یہ ایئر کوالٹی انڈیکس کی سب سے خطرناک سطح سمجھی جاتی ہے۔

قومی دارالحکومت میں بڑھتی ہوئی زہریلی ہوا کے درمیان، دہلی حکومت نے جمعرات کو نرسری سے پانچویں جماعت تک کے اسکولوں کو دو دن (3 اور 4 نومبر) کے لیے بند کرنے کا اعلان کیا تھا۔ جمعہ کو دہلی ہائی کورٹ نے بڑھتی ہوئی فضائی آلودگی کے معاملے پر حکومت کو پھٹکار لگائی تھی۔

جمعرات کو دہلی کے 37 مانیٹرنگ اسٹیشنوں میں سے کم از کم 18 نے ایئر کوالٹی انڈیکس (اے کیو آئی) کو سنگین زمرے میں درج کیا۔ قابل ذکر ہے کہ صفر سے 50 کے درمیان اے کیو آئی کو اچھا، 51 اور 100 کے درمیان تسلی بخش، 101 اور 200 کے درمیان درمیانی، 201 سے 300 کے درمیان خراب، 301 سے 400 کے درمیان انتہائی خراب اور 401 اور 500 کے درمیان کو سنگین زمرے میں سمجھا جاتا ہے۔

ہندوستھان سماچار

/شہزاد