نئی دہلی، 26 اکتوبر (ہ س)۔
الیکشن کمیشن نے فلمی اداکار راجکمار راؤ کو انتخابات میں ووٹروں کی شرکت بڑھانے کے لیے نیشنل آئیکون بنایا ہے۔ جمعرات کو آکاشوانی کے رنگ بھون میں منعقدہ ایک پروگرام میں الیکشن کمیشن اور اداکار کے درمیان اس سلسلے میں ایک ایم او یو پر دستخط کیے گئے۔
نئی دہلی کے آکاشوانی رنگ بھون میں چیف الیکشن کمشنر راجیو کمار اور الیکشن کمشنرز انوپ چندر پانڈے اور ارون گوئل کی موجودگی میں منعقدہ پروگرام میں ‘میں بھارت ہوں، ہم بھارت کے ووٹر ہیں’نظم پیش کی گئی اور ساتھ ہی راجکمار راؤ کی فلم نیوٹن کے کچھ منظر دکھائے گئے۔
پروگرام سے خطاب کرتے ہوئے راجکمار راؤ نے کہا کہ آج وہ کسی فلم کی تشہیر کے لیے نہیں بلکہ جمہوریت میں سب سے اہم ذمہ داری کو نبھانے کے لیے آئے ہیں۔ ووٹ دینا ہمارا حق ہے اور یہ آپ کو جمہوریت میں شرکت کا ایک منفرد تجربہ فراہم کرتا ہے۔ ہمیں اس تجربے سے محروم نہیں ہونا چاہیے۔ وہ ملک کے ووٹرز بالخصوص شہری اور نوجوان ووٹروں سے انتخابات میں بڑھ چڑھ کر حصہ لینے کی اپیل کرتے ہیں۔
الیکشن کمیشن کا شکریہ ادا کرتے ہوئے اداکار نے اپنی فلم نیوٹن کو یاد کیا۔ یہ فلم نکسل متاثرہ علاقے میں تعینات ایک انتخابی افسر پر مبنی ہے۔ انہوں نے کہا کہ فلم کرتے ہوئے انہیں یہ تجربہ ہوا کہ انتخابی عمل میں شامل ملازمین اور افسران نے ملک میں ووٹنگ کرانے کے لیے کتنی محنت کی۔
چیف الیکشن کمشنر راجیو کمار نے کہا کہ ہندوستان تنوع سے بھرا ملک ہے۔ یہ تنوع سب کو ساتھ لے کر چلنے کی طاقت رکھتا ہے۔ جب بھی اختلافات پیدا ہوتے ہیں وہ جمہوریت کے ذریعے حل ہوتے ہیں۔ ہندوستان دنیا کی سب سے بڑی جمہوریت ہے اور اس میں 95 کروڑ ووٹر ہیں۔ ہماری کوششیں شمولیت پر مرکوز ہیں۔ ہمیں فخر ہے کہ آج ملک میں خواتین ووٹرز کی شمولیت میں اضافہ ہوا ہے۔ کئی ریاستوں میں خواتین ووٹر مردوں سے زیادہ ہیں۔
کمیشن نوجوانوں میں انتخابات کے تئیں بے حسی کو دور کرنے کی مسلسل کوششیں کر رہا ہے۔ اس سلسلے میں پہلے سچن تیندولکر اور اب راجکمار راو¿ کو نیشنل آئیکون مقرر کیا گیا ہے۔
قابل ذکر ہے کہ دو ماہ قبل کرکٹ لیجنڈ اور بھارت رتن سچن تیندولکر کو الیکشن کمیشن نے ووٹر بیداری اور تعلیم کے لیے ‘نیشنل آئیکون’ بنایا تھا۔
الیکشن کمیشن آف انڈیا اپنے آپ کو زندگی کے مختلف شعبوں سے تعلق رکھنے والے نامور ہندوستانیوں کے ساتھ منسلک کر رہا ہے اور انہیں الیکشن کمیشن آف انڈیا کے نیشنل آئیکون کے طور پر نامزد کر رہا ہے تاکہ ووٹروں کو جمہوریت کے تہوار میں حصہ لینے کی ترغیب دی جا سکے۔ کمیشن نے پچھلے سال مشہور اداکار پنکج ترپاٹھی کو نیشنل آئیکون کے طور پر تسلیم کیا تھا۔ اس سے قبل، 2019 کے لوک سبھا انتخابات کے دوران، ایم ایس دھونی، عامر خان اور میری کوم جیسے اسٹارس الیکشن کمیشن آف انڈیا کے قومی آئیکون تھے۔
ہندوستھان سماچار
