کٹھمنڈو، 04 جنوری ( ہ س)۔ ہندوستان کے وزیر خارجہ ڈاکٹر ایس جے شنکر نیپال کے دو روزہ دورے پر آج (جمعرات) کٹھمنڈو پہنچ گئے ہیں۔ ہندوستانی فضائیہ کے خصوصی طیارے کے ذریعے کٹھمنڈو پہنچےجے شنکر ہوائی اڈے پر نیپال کے وزیر خارجہ این پی سعود نے ان کا استقبال کیا۔
مقامی وقت کے مطابق صبح 9:30 بجے ہوائی اڈے پرپہنچے وزیر خارجہ سمیت بھارتی وفد کا استقبال کرنے کے لئے نیپال کے وزیر خارجہ کا خودآنا ، اس بات کا اشارہ ہے کہ نیپال بھارتی وزیر خارجہ کے دورے کو بہت اہمیت دے رہا ہے۔ بھارتی وزیر خارجہ کی آمد کے موقع پر کٹھمنڈو میں بھی سیکورٹی کے انتظامات سخت کر دیے گئے ہیں۔
ایئرپورٹ سے ہوٹل میریٹ پہنچ کر بھارتی وزیر خارجہ بھارتی سفارتخانے کے حکام سے بریفنگ لے رہے ہیں۔ ہندوستانی وزیر خارجہ نیپالی صدر رام چندر پوڈیل سے بشکریہ ملاقات کے لیے شیتل نواس پہنچنے والے ہیں۔ اس کے فوراً بعد نیپال کے وزیر اعظم پشپ کمل دہل پرچنڈ سے ان کی سرکاری رہائش گاہ پر ملنے جانے والے ہیں۔
دوپہر میں دونوں ممالک کے وزرائے خارجہ کی باضابطہ ملاقات طے ہے۔ اس میٹنگ کے فوراً بعد نیپال بھارت مشترکہ کمیشن کی میٹنگ ہوگی جس میں تمام دوطرفہ امور پر تبادلہ خیال کیا جائے گا۔ بھارتی وزارت خارجہ کی جانب سے جاری بیان میں کہا گیا ہے کہ بھارت کی جانب سے نیپال میں زیر تعمیر منصوبوں کا جائزہ لیا جائے گا۔
دو طرفہ مذاکرات کے بعد دونوں ممالک کے وزرائے خارجہ کچھ معاہدوں پر دستخط کریں گے جن میں درمیانی اور طویل مدتی بجلی کی تجارت کا معاہدہ سب سے اہم ہے۔ اس کے علاوہ نیپال کے چھوٹے ترقیاتی منصوبے کے لیے ہندوستان کی طرف سے دی جانے والی 5 کروڑ روپے کی رقم کو بڑھا کر 20 کروڑ روپے کرنے کے معاہدے پر بھی دستخط ہونے ہیں۔ نیپال کی وزارت خارجہ نے دونوں ممالک کے وزرائے خارجہ کی جانب سے بجلی کی تین نئی ٹرانسمیشن لائنوں کے افتتاح کی اطلاع دی ہے۔
بھارتی وزیر خارجہ نیپال کی بڑی جماعتوں کے سرکردہ رہنماوں سے بھی ملاقات کرنے والے ہیں۔ ہندوستانی سفارت خانے نے نیپالی کانگریس کے صدر اور سابق وزیر اعظم شیر بہادر دیوبا اور این سی پی ایم ایل اے کے صدر اور سابق وزیر اعظم کے پی شرما اولی سے آج دو پہر ہونے والی ملاقات کے بارے میں بھی مطلع کیا ہے۔ آج رات ہی نیپال کے وزیر خارجہ کی جانب سے بھارتی وزیر خارجہ کے اعزاز میں عشائیہ کا اہتمام کیا گیا ہے جس میں دیگر سیاسی جماعتوں کے سرکردہ رہنما اور سابق وزرائے اعظم ملاقات کرنے والے ہیں۔
ہندوستھان سماچار
