غزہ جنگ میں آئی ڈی ایف نے کی بڑی غلطی، اپنے ہی شہریوں پر کر دی فائرنگ، تین اسرائیلی یرغمالی ہلاک
تل ابیب، 16 دسمبر (ہ س)۔ اسرائیلی سیکورٹی فورسز نے غزہ پٹی میں جنگ کے دوران اپنے ہی ملک کے تین افراد کو ہلاک کر دیا۔ اسے حماس نے یرغمال بنا لیا تھا۔ شجاعیہ میں جنگ کے دوران اس کی موت ہو گئی۔ اسرائیل ڈیفنس فورسز (آئی ڈی ایف) نے مقتول یرغمالیوں کے اہل خانہ سے تعزیت کا اظہار کیا اور واقعے کی شفاف جانچ کا اعلان کیا ہے۔
اسرائیل کے معروف اخبار ٹائمز آف اسرائیل کے مطابق آئی ڈی ایف نے ہینڈل ایکس پر ہلاک ہونے والے تینوں یرغمالیوں کی تصاویر جاری کی ہیں جس سے ان کی شناخت ظاہر کی گئی ہے۔ آئی ڈی ایف کی طرف سے یہ غلطی جنگ کے 70ویں دن جمعہ کو ہوئی۔ اسرائیلی فوج کے سربراہ کے ترجمان ڈینیئل ہگاری نے کہا کہ ابھی تک یہ واضح نہیں ہے کہ تینوں یرغمالی حماس سے فرار ہو گئے تھے یا انہیں رہا کر دیا گیا تھا۔ انہوں نے کہا کہ تمام پہلووں کی تحقیقات کی جائیں گی۔ تینوں کی موت غلط شناخت کی وجہ سے فائرنگ سے ہوئی۔ آئی ڈی ایف نے اپنے ایکس ہینڈل پر کہا ہے کہ اس واقعے سے سبق لیتے ہوئے اس نے جنگی علاقے میں موجود تمام فوجیوں کو ضروری ہدایات دے دی ہیں۔
آئی ڈی ایف نے تین یرغمالیوں کو ہلاک کرنے کا اعتراف کیا کہ ان کی شناخت 28 سالہ یوتم ہیم، 25 سالہ سمر طلالکا اور 26 سالہ ایلون لولو شمریز کے نام سے کی گئی۔ حماس نے ان تینوں نوجوانوں کو 7 اکتوبر کو اغوا کیا تھا۔ قابل ذکر ہے کہ فلسطینی جنگجو تنظیم حماس نے 7 اکتوبر کو جنوبی اسرائیل پر زبردست حملہ کیا تھا۔
حملے کے دوران حماس کے جنگجوں نے 250 افراد کو یرغمال بنالیا اور تقریباً 1200 افراد ہلاک ہوگئے۔ اس کے بعد اسرائیل نے غزہ پر بمباری شروع کردی۔ اسرائیلی حملوں میں اب تک 18700 فلسطینی مارے جا چکے ہیں۔ ٹائمز آف اسرائیل کے مطابق آئی ڈی ایف کے ترجمان ڈینیل ہگاری نے کہا کہ آئی ڈی ایف جمعہ کی صبح پیش آنے والے المناک واقعے کی پوری ذمہ داری لیتا ہے۔
ہندوستھان سماچار
/شہزاد
