بھوٹان میں ہندوستان کی دھوم، وزیر اعظم مودی کے دورہ کا آج آخری دن
تھمپو، 23 مارچ ۔ بھارتی وزیراعظم نریندر مودی کے دو روزہ سرکاری دورے کا آج (ہفتہ) آخری دن ہے۔ بھوٹان میں ہندوستان کی چاروں طرف دھوم ہے۔ ہندوستان اور بھوٹان کے درمیان مضبوط ہوتے تعلقات سے لوگ بہت خوش ہیں۔ وزیر اعظم مودی آج تھمپو میں گیالتسوئین جیتسن پیما مدر اینڈ چائلڈ ہاسپٹلز کا افتتاح کریں گے۔ تھمپو میں یہ جدید ترین اسپتال حکومت ہند کے تعاون سے تعمیر کیا گیا ہے۔
کل (جمعہ) یہاں پہنچے وزیر اعظم مودی کو بھوٹان کے اعلیٰ ترین شہری اعزاز ’’آرڈر آف دی ڈروک گیالپو‘‘ سے نوازا گیا۔ وہ یہ اعزاز حاصل کرنے والے کسی غیر ملکی حکومت کے پہلے سربراہ ہیں۔ وزیر اعظم مودی کو یہ اعزاز ان کی ’’بھارت-بھوٹان تعلقات کے فروغ میں ان کی نمایاں شراکت اور بھوٹانی قوم اور اس کے عوام کے لیے ان کی ممتاز خدمات‘‘ کے لیے دیا گیا ہے۔ بھوٹان کے بادشاہ جگمے کھیسر نانگیال وانگچک نے وزیر اعظم مودی کو ’’آرڈر آف دی ڈروک گیالپو‘‘ سے نوازا۔ اس اعزاز کا اعلان بھوٹان کے بادشاہ نے 17 دسمبر 2021 کو 114 ویں قومی دن کی تقریبات میں کیا تھا۔
وزیر اعظم مودی نے اس اعزاز کے لیے بھوٹان کا شکریہ ادا کیا اور اسے 140 کروڑ ہندوستانیوں کے لیے وقف کیا۔ وزیر اعظم مودی نے اس موقع پر موجود اجتماع سے خطاب کیا۔ انہوں نے کہا کہ یہ اعزاز میری ذاتی کامیابی نہیں ہے۔ یہ ہندوستان اور 140 کروڑ ہندوستانیوں کا اعزاز ہے۔ میں بھوٹان کی اس عظیم سرزمین میں تمام ہندوستانیوں کی طرف سے عاجزی کے ساتھ اس اعزاز کو قبول کرتا ہوں۔ میں اس اعزاز کے لیے آپ سب کا دل کی گہرائیوں سے شکریہ ادا کرتا ہوں۔
وزیر اعظم نے کہا کہ ہندوستان بھوٹان کی شراکت داری صرف زمین اور پانی تک محدود نہیں ہے۔ بھوٹان اب اپنے خلائی مشنوں میں ہندوستان کا شراکت دار ہے۔ بھوٹان کے سائنسدانوں نے اس سیٹلائٹ کو اسرو کے تعاون سے لانچ کیا ہے۔ ہندوستان اور بھوٹان کے نوجوانوں کی خواہشات ایک جیسی ہیں۔ ہندوستان نے 2047 تک ایک ترقی یافتہ ملک بننے کا فیصلہ کیا ہے۔ بھوٹان نے 2034 تک ’’زیادہ آمدنی والا‘‘ ملک بننے کا فیصلہ کیا ہے۔
بھوٹان کو اس کے اہداف کو حاصل کرنے میں تعاون کا یقین دلاتے ہوئے وزیر اعظم نے کہا کہ ہندوستان ’’بی بی‘‘- برانڈ بھوٹان اور بھوٹان ’’بلیو‘‘ کے لیے آپ کے ساتھ کھڑا ہے۔ آنے والے پانچ سال ہمارے تعلقات کو نئی توانائی دیں گے۔ ہم رابطے، انفراسٹرکچر، تجارت اور توانائی کے شعبوں میں راستے بنانے کے لیے کام کریں گے۔ وزیر اعظم مودی نے اپنے ایکس ہینڈل پر اپنے دورے کے پہلے دن کی کچھ تصاویر شیئر کی ہیں۔
