ڈھاکہ، 7 جنوری (ہ س)۔ بنگلہ دیش عوامی لیگ کی صدر اور وزیر اعظم شیخ حسینہ نے امید ظاہر کی ہے کہ ان کی پارٹی 12ویں پارلیمانی قومی انتخابات میں کامیابی حاصل کرے گی۔ انہوں نے کہا کہ مینڈیٹ ان کے حق میں آئے گا۔ اخبار ڈھاکہ ٹریبیون کے مطابق انہوں نے یہ تبصرہ آج صبح ووٹ ڈالنے کے بعد صحافیوں سے کیا۔
صحافیوں کے ایک سوال کے جواب میں شیخ حسینہ نے کہا، ’’بنگلہ دیش نیشنلسٹ پارٹی دہشت گردوں کی جماعت ہے۔ یہ جماعت کبھی الیکشن پر یقین نہیں رکھتی۔ انتخابات میں دھاندلی اور بیلٹ پیپرز میں ہیرا پھیری اس پارٹی کا کردار ہے۔ اب انہیں یہ موقع نہیں مل رہا۔ اس لیے وہ انتخابات کا بائیکاٹ کر رہی ہے۔‘‘
وزیر اعظم حسینہ واجد سے جب غیر ملکی صحافی کے انتخاب کی ساکھ کے بارے میں سوال کیا گیا تو انہوں نے کہا کہ مجھے دہشت گرد جماعت کے سامنے اپنی ساکھ ثابت کرنے کی ضرورت نہیں ہے۔ لوگوں کے تئیں میری جوابدہی ہے۔ لوگ اسے قبول کریں گے یا نہیں یہ میرے لیے اہم ہے۔ انہوں نے اہل وطن سے بھی اپیل کی کہ وہ پولنگ اسٹیشنوں پر جا کر ووٹ ڈالیں۔
وزیر اعظم شیخ حسینہ نے ڈھاکہ سٹی کالج پولنگ اسٹیشن پر صبح 8:30 بجے اپنا ووٹ دیا۔ ان کے ہمراہ ان کی بیٹی صائمہ واجد اور بہن شیخ ریحانہ بھی تھیں۔ ڈھاکہ سٹی کالج سینٹر ڈھاکہ 10 حلقے کے تحت آتا ہے۔ اداکار فردوس احمد یہاں سے عوامی لیگ کے ٹکٹ پر الیکشن لڑ رہے ہیں۔ احمد نے پولنگ بوتھ پر وزیراعظم کا استقبال کیا۔
ہندوستھان سماچار//سلام
