ٹوکیو، 5 دسمبر (ہ س)۔ گزشتہ ہفتے حادثے کا شکار ہوئے امریکی فضائیہ کے اوسپرے طیارے کا ملبہ اور عملے کے تین ارکان کی لاشوں کو امریکی اور جاپانی غوطہ خوروں نے برآمد کرلیا ہے۔ فضائیہ کے ایک اہلکار نے پیر کو یہ جانکاری دی۔ واضح رہے کہ گزشتہ ہفتے امریکی فضائیہ کا ایک طیارہ جس میں عملے کے 8 ارکان تھے جاپان کے جنوب مغربی حصے میں گر کر تباہ ہو گیا تھا۔
اہلکار نے بتایا کہ امریکی فضائیہ کا سی وی- 22 اوسپرے طیارہ گزشتہ ہفتے بدھ کو جاپان کے جزیرہ یاکوشیما کے قریب گر کر تباہ ہو گیا۔ حادثے کے وقت طیارہ تربیتی مشن پر تھا اور اس میں عملے کے آٹھ امریکی ارکان سوار تھے۔ ایئر فورس اسپیشل آپریشنز کمانڈ نے کہا کہ عملے کے پانچ ارکان کی لاشیں آج دیکھی گئیں جن میں سے دو نکال لی گئی ہیں اور ان کی شناخت نہیں ہو سکی ہے۔ اب تک کل تین لاشیں نکالی جا چکی ہیں۔
انہوں نے کہا کہ ملبے سے عملے کے تین دیگر افراد کی لاشیں نکالنے کے لیے امریکہ اور جاپان کے درمیان مشترکہ سرچ آپریشن جاری ہے۔ کمانڈ نے کہا کہ عملے کے دو دیگر ارکان ابھی تک لاپتہ ہیں اور تلاشی مہم جاری ہے۔
اس حوالے سے جاری ایک بیان میں کہا گیا ہے کہ اس کا بنیادی مقصد فضائی اہلکاروں کی لاشوں کو وطن واپس لانا اور ان کے اہل خانہ کی دیکھ بھال کرنا ہے۔ انہوں نے بتایا کہ حادثے میں ہلاک ہونے والے ایک شخص کی شناخت سارجنٹ جیکب گلیہر کے طور پر ہوئی ہے۔ ہفتہ کو ہی اس کی لاش برآمد ہوئی تھی۔ وہ میساچوسٹس کا رہائشی تھا۔ جاپانی بحریہ کے حکام نے اس خبر کی تصدیق کرنے سے انکار کرتے ہوئے کہا کہ وہ امریکی رضامندی کے بغیر تفصیلات جاری نہیں کر سکتے۔
ہندوستھان سماچار//سلام
