کاٹھمنڈو ، 17 دسمبر (ہ س)۔
نیپال کی تریبھون یونیورسٹی نے پیر کو کانووکیشن کی تقریب میں 73 ہزار سے زائد طلباءکو شامل کرکے نیا ریکارڈ قائم کیا ہے۔ یونیورسٹی نے اس کے لیے گنیز بک آف ورلڈ ریکارڈ میں اپنا نام درج کرانے کا دعویٰ بھی کیا ہے۔آج 73 ہزار 749 طلباءکو سرٹیفکیٹ دیئے گئے جنہوں نے 5 مطالعاتی اداروں ، 4 مختلف فیکلٹیوں اور تریبھون یونیورسٹی سے منسلک دیگر تعلیمی اداروں سے اپنی تعلیم مکمل کی۔ کاٹھمنڈو کے دشرتھ تھیٹر میں منعقدہ 49ویں کانووکیشن کی تقریب میں صدر رام چندر پاڈیل اور وزیر اعظم پشپا کمل دہل ’پرچنڈا‘ نے طلباءمیں اسناد تقسیم کیں۔ اس تقریب کی وجہ سے پنڈال کے اطراف کی ٹریفک دن بھر درہم برہم رہی۔یونیورسٹی کے کنٹرولر امتحانات پشپراج جوشی نے کہا کہ صدر اور وزیر اعظم سمیت وی آئی پیز کے ہاتھوں سے 12,415 طلباءکو سرٹیفکیٹ دیے گئے۔ پچھلے کچھ سالوں سے تریبھون یونیورسٹی سالانہ تقریباً 50 سے 60 ہزار طلبہ کو کانووکیشن کی تقریب میں مدعو کرتی رہی ہے۔ اس بار عالمی ریکارڈ بنانے کے مقصد سے یونیورسٹی نے کانووکیشن تقریب میں ایک ساتھ 73 ہزار طلباءکو مدعو کیا۔
امتحانات کے کنٹرولر جوشی نے کہا کہ جس یونیورسٹی کے کانووکیشن میں دنیا بھر میں سب سے زیادہ طلبہ شریک ہوئے، اس نے گنیز بک آف ورلڈ ریکارڈ میں درخواست دی ہے۔ انہوں نے بتایا کہ تقریب میں گنیز بک کے نمائندے ذاتی طور پر موجود تھے اور اس کا جائزہ لیا۔ یونیورسٹی کے وائس چانسلر شیو لال بھوشال نے دعویٰ کیا ہے کہ کانووکیشن کی تقریب میں اتنی بڑی تعداد میں طلبہ کی شرکت کے باوجود معیار میں کوئی کمی نہیں آئی ہے۔
ہندوستھان سماچارمحمدخان
