بالی ووڈ اسٹار اکشے کمار اور ٹائیگر شراف اسٹارر فلم ‘بڑے میاں چھوٹے میاں’ کے گانے ریلیز ہونے کے بعد سے ہی شائقین فلم کو لے کر کافی پرجوش ہیں۔ شائقین کے جوش و خروش کو دیکھتے ہوئے کل 3 منٹ 32 سیکنڈز پر مشتمل فلم کا شاندار بلاک بسٹر ٹریلر آج ریلیز کر دیا گیا ہے۔ اس میں اکشے-ٹائیگر زبردست ایکشن کرتے نظر آ رہے ہیں۔
ٹریلر میں اکشے اور ٹائیگر ملک کو دہشت گردانہ حملے سے بچانے کی کوشش کرتے نظر آ رہے ہیں۔ ٹریلر کے شروع میں ہیلی کاپٹر اور فوج کی گاڑیاں نظر آ ر ہی ہیں۔ پھر پس منظر میں ایک خطرناک دشمن کی آواز آتی ہے، ایک ایسا دشمن جو موت سے بھی نہیں ڈرتا۔ ان کے اس دشمن کا نہ تو کوئی نام ہے اور نہ ہی کوئی شناخت۔ اس دشمن کا ایک ہی مقصد ہے اور وہ ہے انتقام۔ پھر ایک زوردار دھماکہ ہوتا ہے اور کاریں کھلونوں کی طرح اڑنے لگتی ہیں۔ جب ایک افسر نقاب پوش شخص سے پوچھتا ہے کہ وہ کون ہے، تو وہ کہتا ہے، ‘میں پرلے ہوں’۔
بڑے میاں چھوٹے میاں کو علی عباس ظفر نے تحریر کیا ہے اور خود ہی ہدایت کاری کی ہے۔ فلم کو واشو بھگنانی، دیپ شیکھا دیشمکھ، جیکی بھگنانی، ہمانشو کشن مہرا اور علی عباس ظفر نے پروڈیوس کیا ہے۔ یہ فلم عید کے موقع پر 10 اپریل کو بڑے پردے پر ریلیز کی جائے گی۔ اکشے کمار آخری بار ‘مشن رانی گنج’ میں نظر آئے تھے۔ یہ فلم باکس آفس پر زیادہ کمائی نہیں کر پائی۔
