مشہور گلوکار دلجیت دوسانجھ اس وقت تنازعات میں گھرے ہوئے ہیں۔ انہوں نے پیر 23 جون کو اپنی آنے والی فلم ‘سردار جی-3’ کا ٹریلر شیئر کیا۔ یہ فلم 27 جون کو ریلیز ہونے جا رہی ہے۔ ‘سردار جی-3’ کے ٹریلر کے ریلیز ہونے کے بعد دلجیت دوسانجھ کو پاکستانی اداکارہ کے ساتھ فلم ریلیز کرنے پر کافی ٹرول کیا گیا۔
اس پر دلجیت دوسانجھ نے کہا کہ ہم نے فروری میں اس فلم کی شوٹنگ مکمل کی، اس وقت حالات ٹھیک تھے لیکن اس کے بعد بہت کچھ ہوا اور بہت سی چیزیں ہمارے ہاتھ سے نکل گئیں، اس لیے میکرز نے فلم کو بھارت میں ریلیز کرنے کے بجائے ملک سے باہر ریلیز کرنے کا فیصلہ کیا۔
دلجیت نے سوشل میڈیا پوسٹ میں کہا کہ آپ کی معلومات کے لیے ہم نے اس فلم کو اپنے ملک کے موجودہ حالات سے پہلے شوٹ کیا، ملک میں جو کچھ بھی ہوا اس سے پہلے اور اس وقت کسی پاکستانی فنکار پر کوئی پابندی نہیں تھی، ہم اس نازک وقت میں اپنے ملک کے ساتھ کھڑے ہیں، اس لیے ہم اس فلم کو بھارت میں ریلیز نہیں کریں گے۔
پہلگام میں حملے کے بعد بھارتی حکومت نے تمام پاکستانی فنکاروں پر بھارت میں پابندی لگا دی تھی۔ اس وقت پاکستانی اداکار فواد خان اور بھارتی اداکارہ وانی کپور کی فلم ’عبیر گلال‘ بھی تنازعات میں گھری ہوئی تھی۔ اس واقعے کی وجہ سے فلم پر پابندی لگا دی گئی تھی۔
—————
ہندوستان سماچار / عبدالسلام صدیقی
