۔’کافی ود کرن‘ کا آٹھواں سیزن شروع ہو چکا ہے۔ پہلے ایپی سوڈ سے ہی یہ سیزن تنازعات میں پھنسنا شروع ہو گیا ہے۔ دیپیکا پدوکون اور رنویر سنگھ پہلی قسط میں نظر آئے تھے۔ دیپیکا کا اپنے رشتے اور شادی سے متعلق بہت سی باتوں کا انکشاف کرنے والا بیان وائرل ہوا اور لوگوں نے انہیں سوشل میڈیا پر ٹرول کرنا شروع کردیا۔
کرن جوہر کے چیٹ شو کی اگلی قسط میں سنی دیول اور بوبی دیول نظر آئے۔ اس ایپی سوڈ میں سنی دیول اور بوبی دیول کے درمیان کئی موضوعات پر بات ہوئی۔ اس شو میں سنی دیول نے ’غدر-2‘ کی کامیابی پر تبصرہ کیا ہے۔’غدر-2‘ کے ساتھ اکشے کمار اور پنکج ترپاٹھی کی ’اوہ مائی گاڈ-2‘ بھی ریلیز ہوئی تھی۔ سنی دیول نے کرن جوہر کے شو میں انکشاف کیا کہ اس وقت سنی دیول نے اکشے کمار سے فلم کی ریلیز کی تاریخ ملتوی کرنے کی درخواست بھی کی تھی۔
اس بارے میں جب سنی دیول سے پوچھا گیا تو انہوں نے کہا کہ میں نے اکشے کو مشورہ دیا تھا ” اگر ممکن ہو تو فلم کی ریلیز کو ملتوی کر دیں لیکن انہوں نے اسٹوڈیو اور دیگر وجوہات کا حوالہ دیتے ہوئے انکار کر دیا۔ میں نے اس بارے میں کچھ نہیں کہا۔ میں بولنے کے علاوہ کچھ نہیں کر سکتا۔“سنی نے یہ بھی اعتراف کیا کہ 2001 میں جب ‘لگان’ اور ‘غدر’ آمنے سامنے آئے تو ایسی ہی صورتحال پیدا ہوئی تھی۔ لگان کو ناقدین نے سراہا، لیکن ‘غدر’ ‘کبھی خوشی کبھی غم’ کے بعد باکس آفس پر سب سے زیادہ کمائی کرنے والی فلم بن گئی۔
کچھ ماہرین کی رائے ہے کہ اوہ مائی گاڈ- 2 اگر بعد میں ریلیز ہوتی تو مزید بہتر کارکردگی دکھا سکتی تھی۔ فلم اوہ مائی گاڈ-2 جنسی تعلیم اور مشت زنی جیسے سنجیدہ موضوعات پر مبنی تھی جس کی وجہ سے فلم کو سنسر بورڈ سے کئی کٹ ملے ۔ غدر 2 نے باکس آفس پر 600 کروڑ روپے اور اوہ مائی گاڈ 2 نے 200 کروڑ روپے کا کلیکشن کیا تھا۔
ہندوستھان سماچار
