ممبئی، 18 دسمبر (ہ س)۔ فلم انڈسٹری کی 70 کی دہائی کی انتہائی مقبول اداکارہ اور بالی ووڈ اداکارہ کاجول کی والدہ تنوجا کو طبیعت اچانک خراب ہونے پر اسپتال میں داخل کرایا گیا ہے۔ مشہور اداکارہ تنوجا کی خراب صحت کی خبر نے ان کے مداحوں کو تشویش میں مبتلا کر دیا ہے اور وہ ان کی جلد صحت یابی کے لیے دعا گو ہیں۔
ذرائع سے موصول ہونے والی معلومات کے مطابق ڈاکٹر تنوجا کا علاج کر رہے ہیں اور پریشان ہونے کی کوئی وجہ نہیں ہے۔ تنوجا کو ‘آئی سی یو’ میں رکھا گیا ہے اور عمر کی وجہ سے ان کی صحت میں ہونے والی تبدیلیوں اور اس سے پیدا ہونے والی پیچیدگیوں کے لیے ڈاکٹر ان کا علاج کر رہے ہیں۔ انہیں مزید کچھ وقت ڈاکٹر کی نگرانی میں رکھا جائے گا۔ تنوجا کے مداح ان کی جلد صحت یابی کے لیے دعاگو ہیں۔
کاجول یا اجے دیوگن میڈیا سے براہ راست بات چیت سے گریز کرتے رہے ہیں۔ مشہور ہدایت کار کمار سین سمرتھ اور اداکارہ شوبھنا سمرتھ کی بیٹی تنوجا نے ہندی کے ساتھ ساتھ بنگالی فلموں میں بھی اہم کردار ادا کیا ہے۔تنوجا نے شومو مکھرجی سے شادی کی۔ ان کی دو بیٹیاں کاجول اور تنیشا ہیں۔ دونوں نے اپنا کریئر بالی ووڈ میں بنایا ہے۔ تنوجا نے اپنی بڑی بہن نوتن کے ساتھ فلم ‘ہماری بیٹی’ سے بطور چائلڈ آرٹسٹ ڈیبیو کیا۔ اس کے بعد انہوں نے کبھی پیچھے مڑ کر نہیں دیکھا۔ تنوجا نے ‘ہماری یاد آئے گی’، ‘بہاریں پھر بھی آئے گی’، ‘جیول تھیف’، ‘ہاتھی میرے ساتھی’ اور ‘میرے جیون ساتھی’ جیسی سپر ہٹ فلموں کے ذریعے ناظرین پر اپنی چھاپ چھوڑی ہے۔
ہندوستھان سماچار
