پٹنہ ۔
بہار میں ہولی پر شراب کی کھیپ پہنچانے کے لئے اسمگلر ہر وز مختلف طریقے تلاش کر رہے ہیں۔ لیکن محکمہ ایکسائز کی ٹیم ان کے خلاف کریک ڈاؤن کرنے میں کوئی کسر نہیں چھوڑ رہی ہے۔ محکمہ ایکسائز کی ٹیم گزشتہ دو روز سے مسلسل چھاپہ ماری کر رہی ہے۔ اس دوران دو آٹو میں بنائے گئے تہہ خانہ سے بھی کثیر مقدار میں شراب برآمد کی گئی۔
وہیں ایکسائز سپرنٹنڈنٹ ارون کمار مشرا نے کہا کہ بہارمیں شراب کی اسمگلنگ کو روکنے کے لیے محکمہ ایکسائز جھارکھنڈ سے آنے والی ہر چھوٹی بڑی گاڑی کواچھی طرح سے چیک کیاجاتا ہے۔ دریں اثنا رجولی تھانہ علاقے کے چترکولی پنچایت میں واقع مربوط چیک پوسٹ پر ایکسائز ایس آئی پنٹو کمار نے رانچی سے پٹنہ جانے والی بس سے کثیر مقدار میں غیر ملکی شراب ضبط کی۔ بس ڈرائیور اور کنڈکٹر کو بھی گرفتارکرلیا گیا۔
ایکسائز سپرنٹنڈنٹ ارون کمار مشرا نے بتایا کہ مربوط چیک پوسٹ پرگذشتہ رات ر انچی سے پٹنہ جارہی بس بی آر 09ایچ 9401 کی جانچ ایکسائز فورس کے ذریعہ کی گئی ۔ اس دوران بس سے پان مسالہ کے تھیلے میں رکھی گئی غیر ملکی شراب کی کل 252 بوتل ضبط کی گئیں۔ ضبط کی گئی شراب کی کل مقدار 171 لیٹر ہے۔وہیں بس ڈرائیور رانچی رہائشی رام پرکاش تیواری کے بیٹے پر مود کمار اور ساتھ موجود بھوجپور ضلع رہائشی پرتاپ نارائن سنگھ کے بیٹے کمار یش پال کو بھی گرفتار کیا گیا۔
وہیں ایک دوسرے بس کی جانچ کے دوران بنگال سے باڑھ جارہے اشوک سنگھ کے بیٹے آرین سنگھ کو دو بوتل غیر ملکی شراب کے ساتھ گرفتار کیا گیا ہے۔ ضبط بس ، شراب اور گرفتار لوگوں کے خلاف بہار ایکسائز ایکٹ کے تحت ایف آئی آر درج کی گئی ہے ۔
