شیئر بازار کی گراوٹ پر بریک، شروعاتی کاروبار میں سینسیکس اور نفٹی میں اضافہ
نئی دہلی، 10 مئی (ہ س)۔ اس کاروباری ہفتے کے دوران مسلسل دباو کا سامنا کرنے کے بعد آج گھریلو شیئر مارکیٹ میں مضبوطی دکھائی دے رہی ہے۔ آج کے کاروبار کا آغاز معمولی اضافے کے ساتھ ہوا۔ حالانکہ بازار کھلتے ہی ایک مرتبہ فروخت کا دباو بھی بن گیا جس کی وجہ سے شیئر بازار سرخ نشان میں پہنچ گیا۔ لیکن اس کے کچھ ہی دیر بعد خریداروں نے مارکیٹ پر اپنا زور لگا دیا جس کی وجہ سے شیئر مارکیٹ میں تیزی آگئی۔ کاروبار کے پہلے ایک گھنٹے کے بعد سینسیکس 0.68 فیصد اور نفٹی 0.67 فیصد کے اضافے کے ساتھ کاروبار کر رہے تھے۔
شروعاتی ایک گھنٹے کے کاروبار کے بعد شیئر مارکیٹ کے بڑے شیئروں میں سے بی پی سی ایل، آئی ٹی سی، ایشین پینٹس، جے ایس ڈبلیو اسٹیل اور این ٹی پی سی کے شیئر 2.76 فیصد سے لیکر 1.83 فیصد کے اضافے کے ساتھ کاروبار کر رہے تھے۔ دوسری طرف ایل ٹی مائنڈٹری، انفوسس، گراسم انڈسٹریز، لارسن اینڈ ٹوبرو اور ٹاٹا کنزیومر پروڈکٹس کے شیئر 1.89 فیصد سے لیکر 0.27 فیصد کی گراوٹ کے ساتھ کاروبار کرتے نظر آرہے تھے۔
موجودہ کاروبار میں شیئر مارکیٹ میں 2,102 شیئروں میں ایکٹیو ٹریڈنگ ہورہی تھی۔ ان میں سے 1,221 شیئرس منافع کماکر سبز نشان میں جبکہ 881 شیئر خسارے کے بعد سرخ نشان میں کاروبار کر رہے تھے۔ اسی طرح سینسیکس میں شامل 30 شیئروں میں سے 26 شیئرس خریداری کی حمایت کے ساتھ سبز نشان میں بنے ہوئے تھے۔ دوسری جانب فروخت کے دباو کے باعث 4 شیئر سرخ نشان میں کاروبار کر رہے تھے۔ جبکہ نفٹی میں شامل شیئرس میں سے 43 شیئرس سبز نشان میں اور 7 شیئرس سرخ نشان میں کاروبار کرتے نظر آرہے تھے۔
بی ایس ای کا سینسیکس آج 71.28 پوائنٹس کے اضافے کے ساتھ 72,475.45 پوائنٹس پر کھلا۔ کاروبار شروع ہوتے ہی فروخت کے دباو کی وجہ سے یہ انڈیکس سرخ نشان میں گرکر 72,366.29 پوائنٹس تک پہنچ گیا۔ لیکن اس کے فوراً بعد ہی خریداروں نے مارکیٹ میں اپنا زور بنا دیا جس کی وجہ سے اس انڈیکس نے رفتار پکڑ لی۔ بازار میں مسلسل خرید و فروخت کے درمیان کاروبار کے پہلے گھنٹے کے بعد صبح سوا دس بجے سینسیکس 495.54 پوائنٹس کے اضافے کے ساتھ 72,899.71 پوائنٹس پر کاروبار کر رہا تھا۔
سینسیکس کی طرح این ایس ای کے نفٹی نے آج 33.45 پوائنٹس کے اضافے کے ساتھ 21,990.95 پوائنٹس پر تجارت شروع کی۔ مارکیٹ کھلتے ہی فروخت کے دباو کی وجہ سے یہ انڈیکس سرخ نشان میں گر کر 21,950.30 پوائنٹس تک پہنچ گیا۔ لیکن اس کے بعد مارکیٹ پر خریدار حاوی ہوگئے جس کی وجہ سے انڈیکس تھوڑی ہی دیر میں سبز نشان میں ریکور کرکے زوردار مضبوطی حاصل کر لی۔ مارکیٹ میں لگاتار خرید و فروخت کے درمیان ابتدائی 1 گھنٹے کی تجارت کے بعد صبح 10:15 بجے نفٹی 149.55 پوائنٹس کے اضافے کے ساتھ 22,107.05 پوائنٹس کی سطح پر کاروبار کر رہا تھا۔
