نئی دہلی، 9 دسمبر (ہ س)۔ صنعت اور اندرونی تجارت کے فروغ کے محکمے (ڈی پی آئی آئی ٹی) نے اپنے ورکنگ پیپر کا پہلا حصہ شائع کیا ہے جس میں تخلیقی مصنوعی ذہانت (اے آئی) اور کاپی رائٹ قانون کے درمیان باہمی تعلق کا جائزہ لیا گیا ہے۔ اس مقالے میں 28 اپریل 2025 کو ڈی پی آئی آئی ٹی کے ذریعے تشکیل دی گئی آٹھ رکنی کمیٹی (’کمیٹی‘) کی سفارشات کو شامل کیا گیا ہے۔
منگل کو جاری کردہ ایک بیان میں، تجارت اور صنعت کی وزارت نے کہا کہ ایک حکومتی کمیٹی نے مصنوعی ذہانت (اے آئی) کے ڈویلپرز کواے آئی سسٹم بنانے کے لیے قانونی طور پر دستیاب کاپی رائٹ سے محفوظ مواد استعمال کرنے کے لیے لازمی لائسنس دینے کی سفارش کی ہے۔ اس نے اس معاملے پر متعلقہ اسٹیک ہولڈرز سے رائے اور آراءبھی طلب کی ہیں۔ وزارت کے مطابق، کمیٹی کی سفارش یہ ہے کہ لائسنس کے ساتھ کاپی رائٹ رکھنے والوں کے لیے قانونی معاوضے کا حق بھی ہونا چاہیے۔ یہ تجاویز کمیٹی کے تیار کردہ ایک ورکنگ پیپر کا حصہ ہیں، جسے صنعت اور اندرونی تجارت کے فروغ کے محکمے (ڈی پی آئی آئی ٹی) نے اسٹیک ہولڈرز کے خیالات جاننے کے لیے جاری کیا ہے۔
تجارت اور صنعت کی وزارت کے مطابق، اے آئی سسٹمز اور کاپی رائٹ سے متعلق ابھرتے ہوئے مسائل پر بات چیت کی بڑھتی ہوئی ضرورت کو تسلیم کرتے ہوئے، ڈی پی آئی آئی ٹی نے 28 اپریل 2025 کو ایک کمیٹی تشکیل دی تھی۔ آٹھ رکنی کمیٹی، جس کی صدارت ایڈیشنل سکریٹری ہمانی پانڈے کر رہے ہیں، میں قانونی ماہرین اور صنعت اور اکیڈمی کے نمائندے شامل ہیں۔ کمیٹی کو اے آئی سسٹمز کے ذریعے اٹھائے گئے مسائل کی نشاندہی کرنے، موجودہ ریگولیٹری فریم ورک کی جانچ، اس کی مناسبیت کا جائزہ لینے، اور اگر ضروری ہو تو تبدیلیوں کی سفارش کرنے کے ساتھ ساتھ اسٹیک ہولڈرز کے ساتھ مشاورت کے لیے ورکنگ پیپر تیار کرنے کا کام سونپا گیا تھا۔ کمیٹی نے ورکنگ پیپر (حصہ 1) تیار کیا، جسے ڈی پی آئی آئی ٹی نے 8 دسمبر کو عوامی طور پر جاری کیا تھا۔ اس نے 30 دنوں کے اندر تمام متعلقہ اسٹیک ہولڈرز سے رائے اور آراءطلب کیں۔
ہندوستھان سماچار
ہندوستان سماچار / Mohammad Khan
