نئی بلندیوں پر شیئر بازار، نفٹی نے عبور کیا 21 ہزار پوائنٹس کا ہندسہ
نئی دہلی، 8 دسمبر (ہ س)۔ صرف ایک دن کی مندی کے بعد گھریلو شیئر بازار آج ایک بار پھر نئی بلندی پر پہنچ گیا۔ آج کی تجارت کا آغاز مضبوطی کے ساتھ ہوا۔ بازار کھلنے کے بعد فروخت کے معمولی جھٹکوں کا سامنا کرتے ہوئے شیئر بازار میں مسلسل اضافہ ہوا، جس کی وجہ سے سینسیکس اور نفٹی دونوں اب تک کی بلند ترین سطح تک پہنچنے میں کامیاب رہے۔ نفٹی نے آج پہلی بار 21 ہزار پوائنٹس کی سطح کو عبور کیا۔ تاہم بعد میں معمولی فروخت کی وجہ سے اس کی سطح میں قدرے کمی واقع ہوئی۔ کاروبار کے پہلے 60 منٹ کے بعد سینسیکس 0.44 فیصد اور نفٹی 0.42 فیصد کی مضبوطی کے ساتھ کاروبار کر رہے تھے۔
کاروبار کے پہلے ایک گھنٹے کے بعد حصص بازار کے بڑے شیئروں میں جے ایس ڈبلیو اسٹیل، ایچ سی ایل ٹیکنالوجی، این ٹی پی سی، یو پی ایل اور لارسن اینڈ ٹوبرو کے شیئرس 2.96 فیصد سے لیکر 1.21 فیصد کی مضبوطی کے ساتھ کاروبار کر رہے تھے۔ دوسری طرف بی پی سی ایل، بھارتی ایرٹیل، بجاج فائنانس، ہیرو موٹو کارپ اور ڈاکٹر ریڈیز لیبارٹریز کے شیئروں میں 0.62 فیصد سے لیکر 0.40 فیصد کی گراوٹ کے ساتھ کاروبار کرتے نظر آرہے تھے۔
ابھی تک کے کاروبار میں شیئر بازار میں 2,015 شیئروں میں ایکٹیو ٹریڈنگ ہورہی تھی۔ ان میں سے 1,392 حصص منافع کماکر سبز نشان میں جبکہ 623 حصص خسارے کے بعد سرخ نشان میں کاروبار کر رہے تھے۔ اسی طرح سینسیکس میں شامل 30 حصص میں سے 24 حصص خرید کی حمایت کے ساتھ سبز نشان میں بنے ہوئے تھے۔ دوسری جانب فروخت کے دباو کے باعث 6 حصص سرخ نشان میں کاروبار کر رہے تھے۔ جبکہ نفٹی میں شامل شیئروں میں سے 36 شیئر سبز نشان میں اور 14 شیئر سرخ نشان میں تجارت کرتے ہوئے نظر آرہے تھے۔
بی ایس ای کے سینسیکس نے آج ایک بار پھر اوپننگ کا نیا ریکارڈ بناتے ہوئے 144.69 پوائنٹس کے اضافے کے ساتھ 69,666.38 پوائنٹس پر تجارت شروع کی۔ بازار کھلتے ہی فروخت کا ہلکا جھٹکا لگا جس کی وجہ سے انڈیکس گر کر 69,606.69 پوائنٹس کی سطح پر پہنچگیا۔ لیکن اس کے بعد خریداروں نے مورچہ سنبھال لیا جس کی وجہ سے اس انڈیکس کی رفتار بڑھ گئی۔ تھوڑی ہی دیر میں سینسیکس 350 سے زیادہ پوائنٹس کی چھلانگ لگا کر 69,888.33 پوائنٹس کی بلند ترین سطح پر پہنچ گیا۔ بازار میں مسلسل خرید و فروخت کے درمیان کاروبار کے پہلے گھنٹے کے بعد صبح 10:15 بجے سینسیکس 308.81 پوائنٹس کے اضافے کے ساتھ 69,830.50 کی سطح پر کاروبار کر رہا تھا۔
سینسیکس کی طرح این ایس ای کا نفٹی بھی آج 32.95 پوائنٹس کے اضافے کے ساتھ 20,934.10 کی سطح پر کھلا۔ کاروبار شروع ہوتے ہی اس انڈیکس میں بھی معمولی گراوٹ نظر آئی۔ لیکن تھوڑی ہی دیر میں خریدار متحرک ہو گئے اور خریداری شروع کر دی جس کی وجہ سے اس انڈیکس کی رفتار بھی بڑھ گئی۔ صبح 10 بجے سے کچھ دیر پہلے خریداری کی حمایت سے انڈیکس 21,005.05 پوائنٹس کی بلند ترین سطح پر پہنچ گیا۔ حالانکہ اس کے بعد منافع وصولی کی وجہ سے نفٹی اوپری سطح سے قدرے نیچے گر گیا۔ بازار میں لگاتار خرید و فروخت کے درمیان پہلے گھنٹے کی تجارت کے بعد صبح 10:15 بجے نفٹی 87.45 پوائنٹس کے اضافے کے ساتھ 20,988.60 کی سطح پر کاروبار کر رہا تھا۔
ہندوستھان سماچار
/شہزاد
