نئی دہلی، 18 دسمبر (ہ س)۔ انفورسمنٹ ڈائریکٹوریٹ (ای ڈی) نے مدورائی میں مقیم نیومیکس گروپ آف کمپنیز کی 207 کروڑ روپے کی غیر منقولہ جائیداد ضبط کر لی ہے۔ تحقیقاتی ایجنسی نے مالی دھوکہ دہی کے ایک معاملے میں منی لانڈرنگ کی روک تھام ایکٹ (پی ایم ایل اے) 2002 کی دفعات کے تحت گروپ کے خلاف یہ کارروائی کی ہے۔
ای ڈی نے جاری کردہ ایک بیان میں کہا کہ مدورائی میں مقیم نیومیکس گروپ آف کمپنیز کے ذریعہ مالی دھوکہ دہی کے معاملے میں تمل ناڈو کے مختلف مقامات پر 207 کروڑ روپے کی مارکیٹ ویلیو والی غیر منقولہ جائیدادوں کو پی ایم ایل اے، 2002 کے دفعات کے تحت ضبط کیا گیا ہے۔
انفورسمنٹ ڈائریکٹوریٹ نے یہ کارروائی تمل ناڈو پولیس کے اکنامک آفینس ونگ (ای او ڈبلیو) کی طرف سے درج کی گئی ایف آئی آر کی بنیاد پر کی ہے۔ تحقیقاتی ایجنسی کے مطابق، نیومیکس گروپ کی کمپنیوں نے مبینہ طور پر 12 سے 30 فیصد سود کے ساتھ زیادہ منافع کا وعدہ کر کے متعدد سرمایہ کاروں کو مختلف منصوبوں (پلاٹ ڈویلپمنٹ) میں لاکھوں روپے جمع کروا کر دھوکہ دیا ہے۔
ای ڈی نے کہا کہ نیومیکس پراپرٹیز پرائیویٹ لمیٹڈ گروپ نے جرم کی آمدنی کو چھپانے کے لیے اپنے کھاتوں کی کتابوں میں ہیرا پھیری کی تھی۔ مرکزی تفتیشی ایجنسی کے مطابق گروپ کے آڈیٹر نے اپنے بیان میں اس بات کو قبول کیا ہے۔
ہندوستھان سماچار
