شیئر بازار میں فروخت کا دباو، سینسیکس 72 ہزار کی سطح سے نیچے گرا
نئی دہلی، 2 جنوری (ہ س)۔ گھریلو شیئر بازار میں آج دباو کی صورتحال دکھائی دے رہی ہے۔ آج کے کاروبار کی شروعات معمولی اضافے کے ساتھ ہوئی۔ پہلے آدھے گھنٹے تک اتار چڑھاو کا سامنا کرنے کے بعد بازار میں فروخت کا دباو تھا، جس کی وجہ سے سینسیکس اور نفٹی دونوں انڈیکس نے سرخ نشان میں غوطہ لگا دیا۔ کاروبار کے پہلے گھنٹے کے بعد سینسیکس 0.45 فیصد اور نفٹی 0.36 فیصد کی کمزوری کے ساتھ کاروبار کر رہے تھے۔
شروعاتی ایک گھنٹے کا کاروبار ہونے کے بعد حصص بازار کے بڑے شیئروں میں ڈیویز لیبارٹریز، کول انڈیا، سن فارماسیوٹیکلس، سپلا اور ڈاکٹر ریڈیز لیبارٹریز کے حصص 2.33 فیصد سے لیکر 1.04 فیصد کی مضبوطی کے ساتھ کاروبار کر رہے تھے۔ دوسری طرف الٹرا ٹیک سیمنٹ، آئشر موٹرز، مہندرا اینڈ مہندرا، ہیرو موٹو کارپ اور لارسن اینڈ ٹوبرو کے حصص میں 2.51 فیصد سے لیکر 1.23 فیصد کی گراوٹ کے ساتھ کاروبار کرتے نظر آرہے تھے۔
ابھی تک کے کاروبار میں حصص بازار میں 2,057 حصص میں ایکٹو ٹریڈنگ ہورہی تھی۔ ان میں سے 955 حصص منافع کماکر سبز نشان میں جبکہ 1,102 حصص خسارے کے بعد سرخ نشان میں کاروبار کر رہے تھے۔ اسی طرح سینسیکس میں شامل 30 حصص میں سے 7 حصص خریداری کی حمایت کے ساتھ سبز نشان میں بنے ہوئے تھے۔ دوسری جانب فروخت کے دباو کے باعث 23 حصص سرخ نشان میں کاروبار کر رہے تھے۔ جبکہ نفٹی میں شامل شیئروں میں سے 15 شیئر سبز نشان میں اور 35 حصص سرخ نشان میں کاروبار کرتے نظر آرہے تھے۔
بی ایس ای کا سینسیکس آج 60.90 پوائنٹس کی مضبوطی کے ساتھ 72,332.84 پوائنٹس کی سطح پر کھلا۔ کاروبار شروع ہونے کے بعد پہلے آدھے گھنٹے تک معمولی اتار چڑھاو ہوتا رہا۔ لیکن اس کے بعد بازار میں زبردست فروخت کا دباو بن گیا جس کی وجہ سے انڈیکس سرخ نشان میں غوطہ لگا دیا۔ مسلسل فروخت کے باعث یہ انڈیکس 400 سے زائد پوائنٹس گر کر 71,839.42 پوائنٹس کی سطح پر پہنچ گیا۔ حالانکہ اس کے بعد خریداروں نے بھی خریداری کا زور بنانے کی کوشش کی۔ اس کے باوجود اس انڈیکس کی پوزیشن میں کوئی خاص بہتری نہیں آئی۔ بازار میں مسلسل خرید و فروخت کے درمیان کاروبار کے پہلے گھنٹے کے بعد صبح 10:15 بجے سینسیکس 327.38 پوائنٹس کی کمزوری کے ساتھ 71,944.56 پوائنٹس کی سطح پر کاروبار کر رہا تھا۔
سینسیکس کی طرح این ایس ای کے نفٹی نے آج 9.45 پوائنٹس کے معمولی اضافے کے ساتھ 21,751.35 پوائنٹس پر تجارت شروع کی۔ یہ انڈیکس بازار کھلنے کے بعد پہلے آدھے گھنٹے تک فلیٹ سطح پر تجارت کرتا رہا۔ لیکن اس کے بعد چوطرفہ فروخت ہونے کے باعث یہ انڈیکس 21,626.50 پوائنٹس تک گر گیا۔ تاہم اس کے بعد خریداری شروع ہونے کی وجہ سے اس انڈیکس کی پوزیشن میں معمولی بہتری دیکھنے میں آئی۔ بازار میں لگاتار خرید و فروخت کے درمیان کاروبار کے پہلے گھنٹے کے بعد صبح 10:15 بجے نفٹی 78.65 پوائنٹس کی کمزوری کے ساتھ 21,663.25 پوائنٹس کی سطح پر کاروبار کر رہا تھا۔
ہندوستھان سماچار
/شہزاد
