نئی دہلی، 24 نومبر (ہ س)۔ بامبے اسٹاک ایکسچینج (بی ایس ای) اور نیشنل اسٹاک ایکسچینج (این ایس ای) نے قواعد کی خلاف ورزی کرنے پر حکومت ہند کی کمپنی ریل وکاس نگم (آر وی این ایل) پر 10.84 لاکھ روپے کا جرمانہ عائد کیا ہے۔ الزام ہے کہ جولائی تا ستمبر سہ ماہی کے دوران کمپنی کے بورڈ میں آزاد ڈائریکٹرز کی کافی تعداد نہیں تھی۔
اس سلسلے میں موصول ہونے والی معلومات کے مطابق این ایس ای اور بی ایس ای نے یہ جرمانہ کمپنی پر ضابطہ 17(1) پر عمل نہ کرنے پر عائد کیا ہے۔ اس کے تحت نیشنل اسٹاک ایکسچینج اور بامبے اسٹاک ایکسچینج نے الگ الگ آر وی این ایل پر 5,42,800 روپے کا جرمانہ عائد کیا ہے۔ آر وی این ایل نے اس سلسلے میں یہ بھی تسلیم کیا ہے کہ جولائی تا ستمبر سہ ماہی میں کمپنی کے بورڈ میں آزاد ڈائریکٹرز کی کافی تعداد نہیں تھی۔ لیکن کمپنی نے یہ بھی واضح کیا ہے کہ آزاد ڈائریکٹرز کی تقرری میں اس کا کوئی کردار نہیں ہے، بلکہ ان آزاد ڈائریکٹروں کی تقرری حکومت ہند کے ذریعے ریلوے کی وزارت کے ذریعے کی جاتی ہے۔ آر وی این ایل نے ایک بیان جاری کرکے واضح کیا ہے کہ بامبے اسٹاک ایکسچینج اور نیشنل اسٹاک ایکسچینج کی جانب سے اس پر عائد جرمانے کی وجہ سے اس کے کاروبار، اقتصادی یا دیگر سرگرمیوں پر کوئی اثر نہیں پڑے گا۔
قابل ذکر ہے کہ اسٹاک ایکسچینج کی جانب سے آر وی این ایل پر عائد جرمانے کے باوجود دن کے پہلے سیشن میں کمپنی کے حصص میں معمولی اضافے کے ساتھ کاروبار دیکھا گیا۔ آج یہ حصص 166.95 روپے کی سطح پر کھلا اور خریداری کے تعاون سے 168.50 روپے کی سطح پر پہنچ گیا۔ تاہم اس کے بعد اس میں معمولی کمی واقع ہوئی۔ اس کے باوجود دوپہر 12 بجے کمپنی کے حصص 40 پیسے کے اضافے کے ساتھ 167.20 روپے پر ٹریڈ کر رہے تھے۔
ہندوستھان سماچار
