خاندانی اور گپکار الائنس پر جموں و کشمیر کے لوگ کبھی بھروسہ نہیں کریں گے۔ رویندر رینا
جموں، 14 اکتوبر (ہ س)۔ جموں و کشمیر بی جے پی کے صدر رویندر رینا نے خاندانی پارٹیوں اور گپکار الائنس پر تنقید کرتے ہوئے کہا کہ جموں و کشمیر کے لوگ مستقبل میں ان پر کبھی بھروسہ نہیں کریں گے۔ رینا ڈوڈہ میں ایک عوامی جلسے سے خطاب کررہے تھے۔
انہوں نے کہا کہ بی جے پی یو ٹی میں پارلیمانی اور اسمبلی دونوں انتخابات میں کلین سویپ کرے گی اور جموں و کشمیر میں اگلی حکومت بنائے گی۔ گپکار الائنس اور خاندانی جماعتوں کو نشانہ بناتے ہوئے انہوں نے کہا کہ وہ مسترد شدہ لوگ ہیں اور جموں و کشمیر کے ووٹر مستقبل میں ان پر کبھی بھروسہ نہیں کریں گے کیونکہ وہ ان پر اعتماد کھو چکے ہیں۔ خاندانی پارٹیوں کے لیڈروں نے صرف اقتدار کے مزے لینے کے لیے یو ٹی کے عوام کو سستے اور دلکش نعروں کے ذریعے دھوکہ دیا اور عوام کو خدا کے رحم و کرم پر چھوڑتے ہوئے ان خاندانوں اور ان کے قریبی لوگوں نے بے پناہ دولت اکٹھی کی۔
انہوں نے کہا کہ جموں و کشمیر کے لوگوں نے ان پارٹیوں کو ایک ایک کر کے آزمایا ہے اور انہوں نے اقتدار میں رہتے ہوئے سابقہ ریاست کے عوام کے ساتھ بڑی ناانصافی کی ہے۔ انہوں نے کہا کہ جموں و کشمیر میں بڑے پیمانے پر ترقی ان جماعتوں کی آنکھیں کھولنے کے لئے کافی ہے۔ ہم نے بہت ساری عوامی فلاحی اسکیموں اور پروجیکٹوں کو شروع کرکے یو ٹی کے غریب اور پسے ہوئے لوگوں کو فائدہ پہنچایا۔ صرف ڈوڈہ ضلع میں ہی قومی شاہراہ، سرنگیں، ہائیڈرو پروجیکٹس، سڑکیں، میڈیکل کالج اور دیگر پروجیکٹس کا جال بچھایا ہے جن سے کوگ مستفید ہو رہے ہیں۔
ہندوستھان سماچار
/شہزاد
