بنگلورو، 9 دسمبر (ہ س)۔ کرناٹک ہائی کورٹ نے کرناٹک حکومت کے اس حکم پر عبوری روک لگا دی ہے جس میں خواتین ملازمین کے لیے ماہواری کی لازمی چھٹی کو نافذ کیا گیا ہے۔ یہ فیصلہ بنگلور ہوٹل اونرز ایسوسی ایشن کی طرف سے دائر ایک عرضی کے دوران آیا۔
درخواست گزار تنظیم نے دلیل دی تھی کہ چھٹی کی پالیسی کا فیصلہ کرنا اداروں کا اندرونی انتظامی فیصلہ ہے اور ریاستی حکومت کو لیبر قوانین کے تحت ایسا حکم جاری کرنے کا حق نہیں ہے۔
ریاستی حکومت نے 12 نومبر کو فیکٹریز ایکٹ، کرناٹک شاپس اینڈ کمرشل اسٹیبلشمنٹ ایکٹ، پلانٹیشن لیبر ایکٹ، بیڑی اور سگار ورکرز ایکٹ اور موٹر ٹرانسپورٹ ورکرز ایکٹ کے تحت آنے والے تمام اداروں میں ماہواری کی چھٹی کے ایک دن کو لازمی قرار دینے کا حکم جاری کیا تھا۔
حکومت نے 1948 کے فیکٹریز ایکٹ، 1961 کے کرناٹک شاپس اینڈ کمرشل اسٹیبلشمنٹ ایکٹ، 1951 کے پلانٹیشن لیبر ایکٹ، 1966 کے بیڑی اور سگار ورکرز ایکٹ، اور 1961 کے موٹر ٹرانسپورٹ ورکرز ایکٹ کے تحت چلنے والے تمام اداروں کو مذکورہ پالیسی پر عمل کرنے کی ہدایت کرتے ہوئے ایک نوٹیفکیشن جاری کیا ہے۔ تاہم، ہوٹل اونرز ایسوسی ایشن نے ایک پٹیشن دائر کی جس میں دلیل دی گئی کہ چھٹی کی پالیسیاں انفرادی اداروں کا اندرونی انتظامی معاملہ رہنا چاہیے۔
ہوٹل اونرز ایسوسی ایشن کی نمائندگی کرنے والے وکیل پرشانت بی کے نے دلیل دی کہ یہ حکم صنعت سے مشورہ کیے بغیر جاری کیا گیا ہے اور اس سے آپریشنل مشکلات پیدا ہوں گی۔ عدالت نے اس دلیل کو نوٹ کرتے ہوئے پوچھا کہ کیا حکم جاری کرنے سے پہلے انجمنوں کی رائے لی گئی تھی۔ ایسوسی ایشن نے جواب دیا نہیں۔
دلائل سننے کے بعد جسٹس جیوتی مولمانی کی سنگل بنچ نے حکومت کے حکم پر اگلی سماعت تک روک لگا دی۔ عدالت نے یہ بھی کہا کہ اگر حکومت چاہے تو عبوری روک اٹھانے کے لیے درخواست دائر کر سکتی ہے۔
—————
ہندوستان سماچار / عبدالسلام صدیقی
