ممبئی ، 25 نومبر (ہ س)۔ آئین ہند کی 75ویں سالگرہ کے پیش نظر وسئی ویرار میونسپل کارپوریشن کے پہلے میئر راجیو پاٹل نے بدھ کو ایک اہم تعلیمی مہم کا اعلان کیا جس کا مقصد اسکول اور کالج کے طلباء میں آئینی معلومات کو آسان انداز میں فروغ دینا ہے۔ اس موقع پر یہ اطلاع بھی دی گئی کہ پدم شری رمیش پتنگے کی کتاب ’’اپلا سمویدھان‘‘ کے مراٹھی اور انگریزی ایڈیشن کا اجرا بدھ کی شام 5 بجے کیا جائے گ جبکہ اس کتاب کا ہندی ورژن جلد منظر عام پر آئے گا۔اس مہم کے آغاز کے سلسلے میں یش ودیا نکیتن گلوبل اسکول، ویرار ویسٹ میں ایک پریس کانفرنس منعقد ہوئی جس میں پروفیسر ڈاکٹر ارچنا کلکرنی، ہاردک راوت، سنجیو پاٹل اور دیگر معزز افراد نے شرکت کی۔راجیو پاٹل نے اپنے خطاب میں کہا کہ یہ کتاب انصاف، آزادی، مساوات اور بھائی چارے جیسے بنیادی آئینی تصورات کو نہایت سادہ انداز میں بیان کرتی ہے، جس کے باعث طلباء اپنے حقوق اور ذمہ داریوں کو بہتر طور پر سمجھ سکیں گے۔ انہوں نے یہ بھی بتایا کہ اسکول میں 8ویں سے 12ویں جماعت تک کے طلباء کو آئین کی تدریس کا باقاعدہ آغاز کیا جائے گا۔راجیو پاٹل نے کہا کہ معاشرے میں آج بھی بڑی تعداد ایسے لوگوں کی ہے جو آئین کی اہمیت اور اپنے قانونی حقوق سے پوری طرح واقف نہیں ہیں۔ انہوں نے اس بات پر زور دیا کہ نوجوان نسل کو آئینی آگاہی فراہم کرنا وقت کی ضرورت ہے تاکہ وہ مستقبل میں قوم سازی کے عمل میں مضبوط اور باشعور کردار ادا کر سکیں۔ ان کے مطابق یہ پروگرام نوجوانوں میں شہری شعور اور ذمہ داری کا احساس پیدا کرنے کا اہم ذریعہ بنے گا۔مزید بتایا گیا کہ اس پروگرام کے تحت شہر بھر کے طلباء کے لیے تقریری مقابلے، مضمون نویسی، پوسٹر سازی اور نیوز اینکرنگ جیسے مقابلے بھی منعقد ہوں گے۔ اس تقریب میں ڈاکٹر سنجے دیشمکھ (سابق وائس چانسلر، ممبئی یونیورسٹی) اور ایڈوکیٹ سریش کامت مہمان خصوصی کی حیثیت سے موجود ہوں گے۔ہندوستھان سماچار
——————–
ہندوستان سماچار / جاوید این اے
