جموں, 4 اکتوبر (ہ س)۔
بی جے پی نے ہفتہ کو اعلان کیا ہے کہ وہ 24 اکتوبر کو ہونے والے راجیہ سبھا انتخابات میں تمام نشستوں پر امیدوار کھڑے کرے گی۔
پارٹی کے ترجمان سنیل سیٹھی نے پریس کانفرنس سے خطاب کرتے ہوئے کہا کہ بی جے پی نے فیصلہ کیا ہے کہ وہ ہر نشست پر مقابلہ کرے گی۔ اس کے لیے تین امیدوار نامزد کیے جائیں گے۔انہوں نے بتایا کہ پارٹی پہلی دو نشستوں کے لیے ایک ایک امیدوار اتارے گی جبکہ باقی دو نشستوں کے لیے صرف ایک امیدوار میدان میں ہوگا کیونکہ ان دونوں پر ایک ہی انتخاب ہوگا۔
سیٹھی نے کہا کہ ابتدائی دو نشستوں پر بی جے پی علامتی طور پر نیشنل کانفرنس (این سی) کی قیادت والے حکومتی اتحاد کے خلاف امیدوار کھڑا کرے گی، جو ان نشستوں پر باآسانی کامیاب ہو سکتا ہے۔ تاہم باقی دو نشستوں میں سے ایک پر بی جے پی ایک قدآور اور مضبوط امیدوار سامنے لائے گی جہاں اسے کامیابی کے واضح امکانات ہیں۔بی جے پی کے اس فیصلے سے ان ابتدائی نشستوں پر بھی مقابلہ ہوگا جو ماضی میں عموماً بلا مقابلہ جیتی جاتی تھیں۔
پارٹی اجلاس کے حوالے سے سیٹھی نے کہا کہ میٹنگ کا مقصد کسی فرد کے نام پر غور نہیں بلکہ ایسے امیدواروں کے انتخاب پر توجہ دینا تھا جو راجیہ سبھا میں پارٹی کے مؤقف کی مؤثر نمائندگی کر سکیں۔ انہوں نے بتایا کہ کور گروپ کی تجاویز پارٹی کی اعلیٰ قیادت تک پہنچائی جائیں گی۔
ایوان میں فی الوقت نیشنل کانفرنس کی قیادت والے اتحاد کے پاس 53 ارکان، بی جے پی کے پاس 28 جبکہ غیر بی جے پی اپوزیشن کے پاس 7 ارکان موجود ہیں۔
اجلاس میں مرکزی وزیر جیتندر سنگھ اور بی جے پی کے قومی جنرل سکریٹری و جموں و کشمیر انچارج ترن چُغ سمیت دیگر سینئر رہنما شریک ہوئے۔ تاہم حزبِ اختلاف کے لیڈر سنیل کمار شرما اجلاس میں موجود نہیں تھے۔
ہندوستھان سماچار
—————
ہندوستان سماچار / محمد اصغر
