غزہ ،02اکتوبر (ہ س )۔
غزہ کے لیے امدادی سامان لے جانے والے گلوبل صمود الصمود فلوٹیلا نے اعلان کیا کہ اس کی کئی کشتیوں کو اسرائیلی بحریہ نے روک لیا ہے۔بیڑے کے بیان کے مطابق مقامی وقت رات ساڑھے آٹھ بجے اسرائیلی فورسز نے بین الاقوامی پانیوں میں ان کے جہازوں کو غیر قانونی طور پر روکا اور ان پر حملہ کیا۔
العربیہ رپورٹ کے مطابق اسرائیلی وزارتِ خارجہ نے تصدیق کی کہ بیڑے الصمود کی کئی کشتیاں روک دی گئی ہیں اور ان کے مسافروں کو اسرائیلی بندرگاہ منتقل کیا جا رہا ہے۔ وزارت خارجہ نے سوشل میڈیا پلیٹ فارم ایکس پر کہا کہ گریٹا اور ان کے ساتھی محفوظ اور صحت مند ہیں۔ اس سے مراد سویڈن کی ماحولیاتی کارکن گریٹا تھومبر ہیں جو بیڑے میں شریک تھیں۔
بیڑے کے منتظمین نے کہا کہ اسرائیلی فوجی اہلکاروں نے جہازوں پر چڑھنے سے قبل ان کے مواصلاتی نظام کو جام کر دیا، جس کے باعث براہِ راست ویڈیو نشریات اور جہازوں کے درمیان رابطہ ٹوٹ گیا۔
کئی مسافروں نے بتایا کہ بدھ کی شب تقریباً 20 نامعلوم کشتیاں بیڑے کے قریب آئیں، جس پر شریک افراد نے لائف جیکٹ پہن لیں اور اسرائیلی قبضے کے خدشے پر تیار ہو گئے۔
اسرائیلی وزارتِ خارجہ نے اس سے پہلے بھی کہا تھا کہ بحریہ نے بیڑے کو خبردار کیا کہ وہ جنگی علاقے کے قریب پہنچ رہا ہے اور اس سے راستہ بدلنے کا مطالبہ کیا۔
گلوبل صمود فلوٹیلا نے ستمبر کے اوائل میں اسپین سے سفر شروع کیا تھا۔ اس میں 40 سے زائد سول کشتیاں شامل ہیں جن پر تقریباً 500 افراد سوار ہیں، جن میں قانون ساز، وکلا اور کارکنان شامل ہیں۔
اس اقدام کا اہتمام فریڈم فلوٹیلا کولیشن نے علاقائی تنظیموں کے ساتھ مل کر کیا ہے، جن میں مغرب صمود فلوٹیلا اور صمود نوسنتارا بھی شامل ہیں۔
واضح رہے کہ اسرائیل اس سے قبل بھی اسی نوعیت کا ایک بیڑا روک چکا ہے اور اس کے کئی کارکنوں کو گرفتار کر کے ملک بدر کر دیا تھا۔ اسرائیلی حکام کا کہنا ہے کہ وہ غزہ کے لیے اس طرح امدادی سامان داخل ہونے کی اجازت نہیں دیں گے۔
ہندوستھان سماچار
ہندوستان سماچار / عطاءاللہ
