جموں, 28 اگست (ہ س)جموں سرینگر قومی شاہراہ شدید بارشوں کے نتیجے میں اُدھمپور رامبن علاقے میں ہوئے بھاری لینڈ سلائیڈنگ کے باعث مسلسل تیسرے روز بھی ٹریفک کے لیے بند رہی۔ حکام کے مطابق شاہراہ کی بندش کے سبب پانچ سو سے زائد گاڑیاں مختلف مقامات پر کھڑی ہیں۔
وادی کشمیر کو ملک کے دیگر حصوں سے جوڑنے والی 270 کلو میٹر طویل شاہراہ جکھینی اور چنینی کے درمیان کئی مقامات پر متاثر ہوئی ہے۔ ٹریفک پولیس کے مطابق جکھینی سے سرینگر کی طرف کوئی گاڑی جانے کی اجازت نہیں ہے جبکہ نگروٹہ سے ریاسی، چنینی، پٹنی ٹاپ، ڈوڈہ، رامبن، بانہال اور سرینگر کی جانب ٹریفک مکمل طور پر معطل ہے۔ کٹرا اور اُدھمپور کے مقامی شہریوں کو شناختی کارڈ ہمراہ رکھنے کی ہدایت دی گئی ہے تاکہ اُن کی نقل و حرکت میں سہولت فراہم کی جا سکے۔
ادھر بارڈر روڈز آرگنائزیشن کے اہلکار اور مشینری مسلسل ملبہ ہٹانے اور سڑک کی بحالی پر کام کر رہے ہیں۔ یہ رُکاوٹیں منگل کو موسلا دھار بارش اور اچانک سیلابی ریلے کے باعث پیدا ہوئی تھیں۔
ٹریفک ایڈوائزری کے مطابق کشتواڑ سنتھن۔اننت ناگ شاہراہ بھی بند ہے جبکہ سرینگر۔سونمرگ۔گمری روڈ پر بہتر موسم اور بی آر او کی اجازت کے بعد ہی ٹریفک محدود وقت کے لیے چل سکے گا۔ اس روٹ پر پہلے ہلکی گاڑیاں اور بعد میں بھاری گاڑیاں صبح ساڑھے گیارہ بجے سے شام ساڑھے پانچ بجے تک سونمرگ سے کرگل کی طرف روانہ ہو سکیں گی، اس کے بعد کسی گاڑی کو جانے کی اجازت نہیں ہوگی۔ سیکورٹی فورسز کے قافلوں کو بھی ہدایت دی گئی ہے کہ وہ اپنا شیڈول اس انداز میں ترتیب دیں کہ عام شہریوں کی آمد و رفت متاثر نہ ہو۔
ایڈوائزری میں مزید کہا گیا ہے کہ مغل روڈ پر بھی موسم اور سڑک کی صورتحال بہتر ہونے کی صورت میں چھوٹی گاڑیوں اور پرائیویٹ کاروں کو صبح سات بجے سے شام چھ بجے تک بہرام گلہ (پونچھ) اور ہیرپورہ (شوپیاں) سے دونوں اطراف جانے کی اجازت دی جائے گی۔
ہندوستھان سماچار
ہندوستان سماچار / محمد اصغر
