جموں, 23 جولائی (ہ س)جموں و کشمیر میں گزشتہ چوبیس گھنٹوں کے دوران وقفے وقفے سے بارش کا سلسلہ جاری ہے ،جبکہ کئی جگہوں پر گرج چمک کے ساتھ موسلادھار بارش ہو رہی ہے۔ محکمہ موسمیات نے بدھ کے روز ریاست بھر کے لیے موسمی ایڈوائزری جاری کرتے ہوئے اگلے 48 گھنٹوں کے دوران تیز بارشوں، گرج چمک کے طوفان اور بعض علاقوں میں نہایت شدید بارش کی پیش گوئی کی ہے، جس سے عام زندگی متاثر ہونے کا خدشہ ہے۔
ڈائریکٹر محکمہ موسمیات کے مطابق 23 اور 24 جولائی کو جموں ڈویژن کے پونچھ، راجوری، رامبن، ریاسی، ادھمپور، جموں اور کٹھوعہ اضلاع میں تیز سے انتہائی تیز بارش متوقع ہے، جب کہ کشمیر ڈویژن کے چند علاقوں میں بھی درمیانی سے شدید بارش ہو سکتی ہے۔
انہوں نے بتایا کہ 25 تا 27 جولائی کے دوران موسم گرم اور مرطوب رہنے کا امکان ہے اور صرف چند مقامات پر ہلکی بارشیں ہو سکتی ہیں۔ تاہم 28 سے 30 جولائی کے دوران ایک بار پھر بارشوں کا سلسلہ متحرک ہو گا، جس میں وقفے وقفے سے ہلکی تا درمیانی بارش اور بعض مقامات پر شدید بارش ہونے کا امکان ہے، بالخصوص رات کے آخری پہر اور صبح کے اوقات میں جموں خطے میں زیادہ اثر متوقع ہے۔
محکمہ موسمیات نے اس دوران فلیش فلڈ، مٹی کے تودے گرنے، پتھروں کے سرکنے اور ندی نالوں و دریاؤں میں پانی کی سطح بلند ہونے کا انتباہ جاری کیا ہے، جب کہ نشیبی علاقوں میں پانی جمع ہونے کی بھی وارننگ دی گئی ہے۔
کاشتکاروں کو مشورہ دیا گیا ہے کہ وہ 25 تا 27 جولائی کے دوران اپنے زرعی کام بحال کریں، کیونکہ ان دنوں موسم نسبتاً موافق رہے گا۔
محکمہ موسمیات نے عوام، سیاحوں اور متعلقہ انتظامی اداروں سے اپیل کی ہے کہ وہ اس غیر یقینی موسمی صورتحال کے پیش نظر چوکسی اختیار کریں اور کسی بھی ہنگامی صورت حال سے نمٹنے کے لیے تیار رہیں۔
ہندوستھان سماچار
ہندوستان سماچار / محمد اصغر
